AQSh Rossiyaga qarshi yangi sanksiyalar joriy qildi

AQSh prezidenti Jo Bayden Rossiya hukumatining “zararli tashqi harakatlari” tufayli unga qarshi yangi sanksiyalarni qo‘llash to‘g‘risidagi farmonni imzoladi. Bu haqda Oq uy veb-saytiga tayanib, Meduza xabar berdi.

Yangi sanksiyalar Rossiyaning AQShdagi 2020-yilgi prezidentlik saylovlariga aralashishi, AQSh hukumat idoralariga qilingan kiberhujum va Rossiyaning Afg‘onistondagi amerikaliklarga qarshi “Tolibon” jangarilari bilan til biriktirgani bilan bog‘liq. Oq uy fevral oyida Rossiyaning ushbu harakatlar uchun AQSh rasmiylari unga qarshi sanksiyalar rejalashtirayotganini aytgandi.

Yangi cheklovlarga quyidagilar kiradi:

• AQSh rasmiylari nazdida Rossiya razvedka agentliklariga kiberhujumlarda yordam berayotgan Rossiyaning oltita texnologik kompaniyalariga qarshi sanksiyalar;
• AQShdagi 2020-yilgi prezidentlik saylovlariga aralashishda va dezinformatsiya kampaniyalarini o‘tkazishda ayblangan 16 nafar jismoniy shaxs va 16 ta tashkilotga qarshi sanksiyalar;
• Qrimning Rossiyaga qo‘shilishi sababli beshta jismoniy va uchta yuridik shaxslarga qarshi sanksiyalar;
• Rossiyaning Vashingtondagi diplomatik vakolatxonasining o‘n nafar a‘zosini chiqarib yuborish (ular orasida razvedka xodimlari borligi taxmin qilinmoqda);
• Rossiya davlat qarzi bilan operatsiyalar o‘tkazish bo‘yicha cheklovlar: 14-iyundan boshlab amerikalik investorlarga Rossiya Markaziy banki, Moliya vazirligi yoki Milliy boylik fondi tomonidan chiqarilgan davlat obligatsiyalarini birlamchi bozorda sotib olish taqiqlanadi.

Ushbu yangi cheklovlar yanvar oyida Jo Bayden AQSh prezidenti bo‘lganidan beri Oq uy tomonidan Rossiyaga qarshi qo‘llanilgan ikkinchi sanksiyalar to‘plamidir.

Mart oyida Qo‘shma Shtatlar Yevropa Ittifoqi bilan birgalikda Rossiyaning yuqori martabali amaldorlariga muxolifat lideri Aleksey Navalniyning ta’qib qilinishi sababli cheklovlar kiritgan edi. O‘shanda Rossiya Tashqi ishlar vazirligi Yevroittifoq va AQShning sanksiyalarini “Rossiyaga qarshi dushmanlarcha hamla” deb atagan.