Франция пойтахти Парижда кучли ёнғин туфайли вайрон бўлган Нотр-Дам ибодатхонаси 2024 йилга қадар қайта тикланиши мумкин. Франция маданият вазири Розлин Башлонинг таъкидлашича, реконструкция ишлари учун 830 миллион евро хайрия маблағлари йиғилган. Иншоотнинг хавфсизлигини таъминлаш бўйича ишлар ёзда якунланади ва бир вақтнинг ўзида тиклаш бошланади. Нотр-Дам ибодатхонасининг ҳозирги кўриниши ҳақида «РБК» фоторепортаж тайёрлади.
Франция президенти Эммануэль Макрон 15 апрель куни соборни зиёрат қилди ва уни 2024 йилга келиб меҳмонларга очиш режасини тасдиқлади. «Кўриб турганимиздек, икки йил ичида жуда катта ҳажмдаги ишлар амалга оширилди», — деди давлат раҳбари.
Апрель ойи бошида расмийлар ибодатхона реконструкцияси учун яна 15 ёки 20 йил вақт кетиши мумкинлигини айтган эди. Аммо улар Нотр-Дам 2024 йилгача ҳеч бўлмаганда ибодат учун очиқ бўлишини ваъда қилди.
Ибодатхона мутасаддиси Патрик Шове АP’га шундай баёнот берди: «Бугун мен собор сақланиб қолди, деб бемалол айта оламан. У яхши ҳимоя билан таъминланди, энди биз бутун бошли бинонинг барқарорлигини бузмайдиган улкан реконструкция ишларини амалга оширсак ҳам бўлади».
Нотр-Дам 2019 йилнинг 15 апрелида ёниб кетган эди. Ёнғин 12 соатдан кўпроқ давом этган. Натижада тиргак ва томнинг учдан бир қисми қулаб тушган. Прокуратура ибодатхона қасддан ёқиб юборилгани ҳақидаги тахминларни рад қилиб, ёнғин сабаби электр симларининг носозлиги ёки ўчирилмаган сигарет қолдиғи бўлиши мумкин, деб ҳисоблайди. Шунингдек, Патрик Шове ёнғин компьютер иши носозлиги оқибатида юзага келган бўлиши мумкинлигини айтган.
Франция президенти ёнғин содир бўлганидан сўнг, беш йил ичида соборни қайта очишни мақсад қилган ва тиклаш учун маъсул бўлган махсус вакилини тайинлаган. Париж архитектура бюроси қайта тиклаш лойиҳасини ишлаб чиқиб, собор томини шиша, эман ва углерод толасидан қайта қуриш таклиф қилган. Айнан бино ишга тушириладиган 2024 йилда Парижда ёзги Олимпия ўйинлари ўтказилиши керак.
Изоҳ (0)