AQShning Indiana shtati Indianapolis shahridagi FedEx logistika kompaniyasi omborida otishma sodir bo‘ldi. Hodisa oqibatida bir necha kishi halok bo‘ldi, deb yozadi Meduza.
Xabarga ko‘ra, otishma 15-aprel kuni kechqurun shaharning janubi-g‘arbiy qismida, mahalliy aeroport yaqinida joylashgan yetkazib berish xizmati omborida sodir bo‘lgan. Politsiya ma’lumotlariga ko‘ra, otishmada sakkiz kishi halok bo‘lgan. Yana to‘rt kishi jarohatlar bilan kasalxonalarga yetkazilgan, jabrlanganlardan birining ahvoli og‘ir. Hodisa sabablari hozircha noma’lum.
Mahalliy ommaviy axborot vositalari otishma haqida guvohlarning ba’zi xabarlarini e’lon qildi. Guvohlardan biri binoda polda yotgan bir kishini ko‘rgani haqida xabar bergan. Boshqasining aytishicha, otishma paytida uning jiyani o‘z mashinasida yaqin atrofdagi to‘xtash joyida bo‘lgan va qo‘lidan o‘q yeb, yaralangan holda kasalxonaga yotqizilgan.
Dastlabki ma’lumotlarga ko‘ra, Indianapolisda o‘t ochgan jinoyatchi o‘z joniga qasd qilgan.
Avvalroq AQShning Tennessi shtati Noksvill shahrida joylashgan maktabda ham otishma yuz bergan edi, oqibatda bir kishi halok bo‘lgan, politsiya ofitseri yaralanib, kasalxonaga yetkazilgan. Bungacha AQShda 16-, 22- va 31-mart kunlari ham shunday hodisalar bo‘lib o‘tgan edi.
31-mart kuni Kaliforniya shtatining Orinj okrugida yuz bergan otishma oqibatida to‘rt kishi halok bo‘ldi, bir kishi yaralangan.
22-mart kuni Kolorado shtatining Boulder shahridagi supermarketda 21 yoshli Ahmat Alissa otishma sodir etgan, oqibatda 10 kishi, shu jumladan, bir nafar politsiya xodimi halok bo‘lgan. Rasmiy ma’lumotlarga ko‘ra, gumondor otishmadan olti kun oldin hujum qurolini sotib olgan. AQSh prezidenti Jo Bayden Koloradodagi otishma oqibatida halok bo‘lganlar xotirasiga besh kunlik motam e’lon qilgan.
Avvalroq Jo Bayden AQSh Kongressiga qurol sotishga oid shartlarni murakkablashtirishni taklif qilgani haqida xabar berilgandi.
Izoh (0)