Олий Мажлис Қонунчилик палатаси депутати Расул Кушербаев Янгийўлдаги канализация тармоқлари таъмирланмагани сабаб қурилиш вазири Ботир Зокировга эътироз билдириб, видеомурожаат йўллади.
Депутатнинг сўзларига кўра, сув тозалаш иншооти Тошкент вилоятининг Янгийўл туманида жойлашган бўлиб, кўп йиллардан бери ишламайди.
«Янгийўл шаҳридаги канализация тармоқларидан келадиган ифлос сув, тозаланмай тўғри тоза ариққа тушириб юборилади. Ишламай турган ушбу иншоот шу атрофда яшайдиган кўплаб одамларнинг дарди ва фожиаси. Кўп аччиқ хотиралар сабабчиси: ифлос ҳаво, ифлос сув, ғуж-ғуж чивин-у пашшалар макони... Ҳатто ўспирин ёшдаги ўз жияним иншоотнинг қаровсиз очиқ чуқурчасига бехос тушиб кетиб, ифлос сувдан вафот этган», — дейди Кушербаев.
Кушербаевнинг таъкидлашича, у 2019 йили бош вазир Абдулла Ариповга кириб илтимос қилганимдан сўнг, иншоотни таъмирлаш ишлари бошланган.
«Бироқ хурсандчилигимиз кўпга чўзилмади. Ҳисоб палатасининг тушунарсиз талаби билан ишлар тўхтатилди, Қурилиш вазири ва Уй-жой коммунал хизмат кўрсатиш вазирининг хоҳиши сабаб эса ишлар чўзилиб, мана учинчи йилдирки, объект ўзгаришсиз ётибди.
Кейин янги лойиҳа бўйича ишлаймиз дейишди. Лекин Қурилиш вазирлиги билан ўша пайтдаги Уй-жой коммунал хизмат кўрсатиш вазиримиз [Музаффар Солиев — таҳр.] буни хоҳламади. Бир йил олдин шу ернинг ўзида қилинган тақдимотларнинг ўзим гувоҳи бўлганман. Ҳукумат тайёр бераман деб турган пулни хоҳлашмади, ўйин қилишди.
Ҳурматли вазиримиз Ботир Зокиров арзон вариантдаги янги лойиҳа бўйича қурилишни хоҳламади, ‘эски бўйича қиламиз’ деди. Лойиҳачи тадбиркорни қайтариб юборди. Ўзлари танийдиган болаларига бермоқчи бўлди, шу ерни. Мана, 2020 йил ҳам ўтди, 2021 йилнинг 14 апрели бугун. Раҳмат ўша вазирларга!
Ҳозирда амалдаги вазиримиз Ботир Зокиров сизни вазир бўлиб сайланишингизга ўзи овоз бермай, қарши бўлган эдим. ‘Коррупцияга қарши курашаман’, деган эдингиз, ваҳолангки, қурилишдаги коррупция сизни даврингизга кўпайди», — дейди Кушербаев.
«Масъулларга ишониб, одамларни ишонтирган бизда эса кўзларига қарашга бет йўқ», — деб таъкидлайди депутат.
Аввалроқ Расул Кушербаев «Ўзавтосаноат»га 100 гектар суғориладиган ернинг беғараз ва аукционсиз берилишини танқид қилгани, 2 ёшгача бола пулини олишни ҳаммага қайтариш кераклигини айтгани ҳамда Олий суд фуқароларни қабул қилмаётганини танқид қилгани ҳақида хабар берилганди.
Изоҳ (0)