Moliyaviy piramida tashkil qilgani uchun 150 yil muddatga ozodlikdan mahrum qilingan moliyachi Berni Meydoff 14-aprel kuni 82 yoshida Shimoliy Karolina shtatining federal qamoqxonasida vafot etdi. Bu haqda Associated Press xabar berdi.
2020-yilning fevral oyida Berni Meydoff bir yarim yil umri qolganini aytib, muddatidan oldin ozod qilinishini so‘ragan. O‘shanda sobiq moliyachining surunkali buyrak yetishmovchiligidan aziyat chekayotgani ma’lum bo‘lgan, lekin uning murojaati rad etilgan.
“Meydoff o‘z jinoyatlarining jiddiyligi borasida bahslashmoqchi hamda o‘zi zarar yetkazgan insonlarning his-tuyg‘ularini yerga urmoqchi emas, biroq u suddan oz miqdorda bo‘lsa ham o‘ziga nisbatan mehribonroq va shafqatliroq bo‘lishni so‘ramoqda”, — degan Meydoffning advokati.
The New York Times gazetasining yozishicha, Berni Meydoff tarixdagi eng yirik moliyaviy piramidalardan birining asoschisi edi. Uning kompaniyasi 1960-yillardan boshlab o‘z mijozlarini yillik 12 foiz daromad bilan ta’minlab, investitsiyalar jalb qilgan. Kompaniyaning ma’lumot berishicha, Meydoff 65 milliard dollarlik aktivlarga egalik qilgan, lekin u tergov jarayonlarida firmaning hech qanday shartnomalarsiz ishlagani va barcha pullar moliyachining hisob raqamiga kelib tushganini tan olgan.
Moliyaviy ko‘zbo‘yamachilik tizimi 2008-yilgi moliyaviy inqiroz tufayli fosh bo‘ldi. 136 mamlakatdan 37 ming kishi bu tizimning jabrlanuvchisiga aylandi. Ular kompaniyaga jami 17,5 milliard dollar mablag‘ kiritgan. Jabrlanuvchilar orasida rejissor Stiven Spilberg, aktyor Kevin Bekon, Nobel mukofoti laureati Eli Vizel bor edi.
Meydoff o‘g‘illariga kompaniyaning “katta yolg‘on” ekanini aytgach, ular huquqni muhofaza qilish organlariga xabar bergan va Meydoff 2008-yilning 11-dekabr kuni Nyu-York shahrining Manxetten tumanida hibsga olingan. 2009-yilning mart oyida Berni Meydoff qimmatli qog‘ozlarni qalbakilashtirganini tan olgan va qilmishidan afsuslanishini bildirgan.
Ma’lumot uchun, Meydoff 2019-yil iyul oyida palliativ yordam ko‘rsatish bo‘limiga o‘tkazilgan edi. Buyrak kasalliklaridan tashqari marhum yurak-qon tomir xastaliklari, xususan, gipertoniyadan ham aziyat chekkan.
Izoh (0)