Yaponiyaning avariya sodir bo‘lgan “Fukusima-1” atom elektr stansiyasi (AES)dagi tarkibida radioaktiv moddalar bor suvni Tinch okeaniga to‘kish to‘g‘risidagi qarori rossiyalik ekologlarni xavotirga solmoqda. Bu haqda “Interfaks” xabar berdi.
“Radionuklidlardan tozalaymiz degan gaplariga qaramay, ularning AESdagi suvni okeanga to‘kishi yaxshi fikr emas. Yaponiya suvni past konsentratsiya (radioaktiv tritiy)gacha suyultirishni rejalashtirmoqda, ammo bu qancha vaqt olishi noma’lum”, — dedi Butunjahon yovvoyi tabiat fondi (WWF) dengiz dasturining katta maslahatchisi Konstantin Zgurovskiy.
Shu bilan birga, u Yaponiyaning boshqa iloji yo‘qligi, chunki AESdagi suv omborlari to‘lib borayotgani va tez orada reaktorlarni sovutadigan suvni to‘kib yuborishga joy qolmasligini ham aytib o‘tdi.
Ekolog Yaponiyaga qo‘shni mamlakatlarning xavotiri o‘rinli deb hisoblaydi, chunki suvdagi radioaktiv zarralar oqim bo‘ylab tarqalishi mumkin. “Baxtimizga oqim Rossiya tomonga emas, Tinch okeaniga boradi. AESdagi avariyadan keyin Kaliforniyaga tutash suvlar tarkibida radionuklidlar ko‘paygani qayd etilgan. Shuning uchun ham qo‘shni davlatlar xavotirlanmoqda”, — deydi Zgurovskiy
O‘z navbatida, “Grinpis” xalqaro ekologik tashkilotining Rossiyadagi bo‘limi direktori Ivan Blokov Yaponiya rasmiylarining qarorini sharhlar ekan, “har qanday holatda ham radioaktiv chiqindilarni ochiq muhitga tashlash axloqiy jihatdan nomaqbul”, dedi.
Uning fikricha, AESdan chiqarib tashlanadigan suvdagi zararli moddalarni to‘liq bartaraf etishning iloji yo‘q. “Bu eng yaqin joylardagi atrof-muhitga juda yomon ta’sir qiladi”, — dedi ekolog.
Rossiya Tokioning qo‘shni davlatlar, shu jumladan, Rossiya bilan “Fukusima-1” AESdan suvni okeanga tushirish rejasi bo‘yicha maslahatlashuvlar o‘tkazishni zarur deb hisoblamaganidan afsusda. Bu haqda avvalroq Rossiya Tashqi ishlar vazirligining rasmiy vakili Mariya Zaxarova ta’kidlab o‘tgan.
Eslatib o‘tamiz, Yaponiyadagi “Fukusima-1” AESdagi radioaktiv moddalardan tozalangan suv ikki yildan so‘ng Tinch okeaniga quyilishni boshlaydi. “Fukusima-1”da tozalangan suv miqdori doimiy ravishda ortib bormoqda. Reuters ma’lumotlariga ko‘ra, ayni paytda uning hajmi 1,25 million tonnani tashkil etadi. AESda suv yadro reaktorlarini sovitish uchun ishlatiladi. Uni radioaktiv elementlardan butunlay tozalab bo‘lmaydi. Shuning uchun, suv qo‘shimcha ravishda toza suyuqlik bilan aralashtiriladi va shundan keyingina okeanga tashlanadi. Hozirda tozalangan suv “Fukusima-1” hududidagi suv omborlarida saqlanmoqda. Taxminlarga ko‘ra, 2022-yilning yoziga qadar omborlar suvga liq to‘ladi.
Yaponiya rasmiylarining qarori bir qator davlatlarning salbiy reaksiyasiga sabab bo‘ldi. Xitoy Tashqi ishlar vazirligi Yaponiyaning suvni Tinch okeaniga to‘kish to‘g‘risidagi qarorini mas’uliyatsizlarcha o‘ylangan va qo‘shni mamlakatlarga zarar yetkazishi mumkin, deya tanqid qildi.
AQSh esa Yaponiyaning AESdagi suvni yo‘q qilish masalasiga mas’uliyat bilan yondashganiga va Tokio hukumatining mazkur masalada kelgusi harakatlarini ham muvofiqlashtirishiga umid qilmoqda.
Izoh (0)