Молиявий пирамида асосчиси, 150 йилга озодликдан маҳрум қилинган Берни Мейдофф қамоқхонада вафот этди

Молиявий пирамида ташкил қилгани учун 150 йил муддатга озодликдан маҳрум қилинган молиячи Берни Мейдофф 14 апрель куни 82 ёшида Шимолий Каролина штатининг федерал қамоқхонасида вафот этди. Бу ҳақда Associated Press хабар берди.

2020 йилнинг февраль ойида Берни Мейдофф бир ярим йил умри қолганини айтиб, муддатидан олдин озод қилинишини сўраган. Ўшанда собиқ молиячининг сурункали буйрак етишмовчилигидан азият чекаётгани маълум бўлган, лекин унинг мурожаати рад этилган.

«Мейдофф ўз жиноятларининг жиддийлиги борасида баҳслашмоқчи ҳамда ўзи зарар етказган инсонларнинг ҳис-туйғуларини ерга урмоқчи эмас, бироқ у суддан оз миқдорда бўлса ҳам ўзига нисбатан меҳрибонроқ ва шафқатлироқ бўлишни сўрамоқда», — деган Мейдоффнинг адвокати.

The New York Times газетасининг ёзишича, Берни Мейдофф тарихдаги энг йирик молиявий пирамидалардан бирининг асосчиси эди. Унинг компанияси 1960 йиллардан бошлаб ўз мижозларини йиллик 12 фоиз даромад билан таъминлаб, инвестициялар жалб қилган. Компаниянинг маълумот беришича, Мейдофф 65 миллиард долларлик активларга эгалик қилган, лекин у тергов жараёнларида фирманинг ҳеч қандай шартномаларсиз ишлагани ва барча пуллар молиячининг ҳисоб рақамига келиб тушганини тан олган.

Молиявий кўзбўямачилик тизими 2008 йилги молиявий инқироз туфайли фош бўлди. 136 мамлакатдан 37 минг киши бу тизимнинг жабрланувчисига айланди. Улар компанияга жами 17,5 миллиард доллар маблағ киритган. Жабрланувчилар орасида режиссёр Стивен Спилберг, актёр Кевин Бэкон, Нобель мукофоти лауреати Эли Визель бор эди.

Мейдофф ўғилларига компаниянинг «катта ёлғон» эканини айтгач, улар ҳуқуқни муҳофаза қилиш органларига хабар берган ва Мейдофф 2008 йилнинг 11 декабрь куни Нью-Йорк шаҳрининг Манхэттен туманида ҳибсга олинган. 2009 йилнинг март ойида Берни Мейдофф қимматли қоғозларни қалбакилаштирганини тан олган ва қилмишидан афсусланишини билдирган.

Маълумот учун, Мейдофф 2019 йил июль ойида паллиатив ёрдам кўрсатиш бўлимига ўтказилган эди. Буйрак касалликларидан ташқари марҳум юрак-қон томир хасталиклари, хусусан, гипертониядан ҳам азият чеккан.