8-aprel kuni soat 14:55 larda Namanganda Spark avtomobilining ag‘darilib ketishi oqibatida bir nafar yo‘lovchi vafot etdi, deb xabar beradi viloyat IIB axborot xizmati.
Ma’lum qilinishicha, Namangan—Chortoq yo‘lining 36-kilometrida Spark rusumli avtomashinani boshqarib ketayotgan haydovchi harakat xavfsizligini ta’minlay olmay, boshqaruvni yo‘qotgan. Oqibatda avtomobil yo‘lning o‘ng chetiga chiqib, ag‘darilib ketgan.
Avtomashinada bo‘lgan 21 yoshli yo‘lovchi og‘ir tan jarohati olib, shifoxonada vafot etgan. Shuningdek, mashina haydovchisi hamda yana ikki nafar yo‘lovchi turli tan jarohatlari bilan shifoxonaga yotqizilgan.
Mazkur holat bo‘yicha shahar IIO FMB huzuridagi Tergov bo‘linmasi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilgan.
Avvalroq Yakkasaroyda Lacetti, Damas hamda Spark ishtirokida YTH sodir bo‘lgani, Surxondaryoda Cobalt va Spark to‘qnashuvi oqibatida 6 kishi halok bo‘lgani va haydovchilardan biri 8 yilga qamalgani, Jizzaxda yuk mashinasi va 2 avtomobil ishtirokidagi YTH oqibatda 1 kishi vafot etgani to‘g‘risida xabar berilgandi.
Izoh (0)