Farg‘onada Nexia zovurga tushib ketishi oqibatida haydovchi halok bo‘ldi

Farg‘ona viloyatida Nexia rusumli avtomashina haydovchisi boshqaruvni yo‘qotishi oqibatida zovurga tushib ketdi. Bu haqda “Daryo”ga viloyat IIB axborot xizmati xabar berdi.

Qayd etilishicha, 2021-yil 3-aprel kuni Furqat tumani Qushchi qishlog‘i hududida haydovchi Sh.N. boshqaruvni yo‘qotishi oqibatida Nexia avtomashinasi yo‘l chetidagi zovurga tushib ketgan.

Natijada haydovchi og‘ir tan jarohati olib, voqea joyida vafot etgan. Avtomobilda bo‘lgan yo‘lovchi G‘.I. tan jarohati olib, shifoxonaga yotqizilgan.

Mazkur holat yuzasidan Furqat tumani IIB huzuridagi tergov bo‘linmasi tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.

Hozirda tergov-surishtiruv ishlari olib borilmoqda.

Eslatib o‘tamiz, avvalroq Qoraqalpog‘istonda Cobalt yo‘l chetidagi betonga urilishi oqibatida haydovchi vafot etgani haqida xabar berilgan bo‘lsa, Surxondaryoda haydovchining uxlab qolishi oqibatida Nexia beton devorga borib urilishi natijasida yo‘lovchi vafot etgani ma’lum bo‘lgandi.