Ouen, Ibragimovich, Pepe. “El-Klasiko”larda gol urgan, biroq muxlislar yodidan ko‘tarilgan 10 futbolchi

Lionel Messi, Raul, Luis Suares, Serxio Ramos, Neymar, Krishtianu Ronaldu, Xavi, Karim Benzema, Luish Figu, Roberto Karlos, Ronaldu, Rivaldo va Ronaldinyo... Sayyoradagi eng ulkan uchrashuv hisoblangan “El-Klasiko”da gol urgan futbol yulduzlari ro‘yxatini yana uzoq davom ettirish mumkin.

Hatto jamoalarning hozirgi murabbiylari Ronald Kuman va Zinedin Zidan ham klasikolarda gol urgan. Zidan bu ishni uch marta qilgan bo‘lsa, Kuman “Real” darvozasiga beshta gol urgan.

Shunday bo‘lsa-da, “El-Klasiko”larda gol urgan, biroq muxlislar yodidan ko‘tarilib ketgan nomlar talaygina. Bunga sabab ularning ayrimlari mashhur to‘purar emas, ba’zilari esa boshqa klubda o‘zini ko‘rsata olgan. Quyida XXI asrda klasikolarda gol urgan, biroq ko‘pchilikning yodidan chiqib ulgurgan futbolchilar haqida so‘z yuritamiz.

Nikolya Anelka (“Real Madrid”)

Klasikodagi goli: 2000-yil

Anelka ismini eshitganda ko‘pchilik uning APL klublari bo‘ylab qilgan “sayohati”ni eslaydi. Aksariyat muxlislar uning klasikoda gol urgani, tugul “Real” safida harakat qilganini ham bilmaydi. Biroq fransiyalik futbolchi asrning ilk “El-Klasiko”sida o‘z nomini tabloga yozdirib qo‘ya olgan, o‘shanda Madrid shahri jamoasi o‘z uyida “Barselona”ni 3:0 hisobida yenggandi.

Jovanni van Bronkxorst (“Barselona”)

Klasikodagi goli: 2004-yil

Van Bronkxorst “Arsenal”dan “Barselona”ga yo‘l olgan, biroq u Mark Overmars yoki Emmanuel Petidan farqli o‘laroq katalonlar safida muvaffaqiyatga erishgan. Frank Raykaard qo‘l ostida va Ronaldinyo yetakchiligida “uyg‘onayotgan” “Barselona” Madriddagi 2:1 hisobidagi g‘alabadan keyin o‘z uyida azaliy raqibini 3:0 hisobida taslim etadi. Jovanni esa ushbu gollarning ikkinchisiga mualliflik qiladi.

Maykl Ouen (“Real Madrid”)

Klasikodagi goli: 2005-yil

“Real” 2004/05-yilgi mavsumning dastlabki qismida “Barselona”dan 0:3 hisobidagi qaqshatqich mag‘lubiyatni qabul qilib oladi. Biroq ikkinchi davrada madridliklar 4:2 hisobidagi ishonchli g‘alabani qo‘lga kiritadi. “Madrid”ning to‘rtinchi goliga esa jamoa tarixidagi eng yomon transferlardan biri deya ta’riflanadigan Ouen muallif bo‘ladi.

Ruud van Nistelroy (“Real Madrid”)

Klasikodagi gollari: 2007, 2008

Lionel Messi 2007-yilgi klasikoda het-trik qayd etgan holda o‘zini butun olamga ko‘z-ko‘z qiladi. Ammo bu o‘yin yakunda 3:3 hisobi bilan tugaydi va “Manchester Yunayted”ning sobiq forvardi bu bahsda dublga muallif bo‘ladi. Niderlandiyalik futbolchi Madridda u qadar uzoq muddat harakat qilmagan bo‘lsa-da, yuqori samaradorlik ko‘rsatgan: u uch yarim mavsum davomida “Real” safida 96 o‘yin o‘tkazib, 64 ta gol muallifiga aylandi va ularning uchtasi “El-Klasiko”da kiritildi.

Zlatan Ibragimovich (“Barselona”)

Klasikodagi goli: 2009-yil

Zlatan A Seriya, Liga 1 va MLS afsonasi hisoblanadi. Biroq uning La Ligadagi faoliyati u qadar muvaffaqiyatli kechmagan. Biroq shvetsiyalik yulduz o‘z nomini “El-Klasiko” tarixiga gol bilan yozdirib qo‘ya olgan. 2009-yildagi klasikoda Zlatan qanotdan uzatilgan to‘pni darvozaga joylagan holda “Kamp Nou”ni larzaga keltiradi va bu gol uchrashuvda yagonaligini saqlab qoladi.

Aryen Robben (“Real Madrid”)

Klasikodagi goli: 2008-yil

Niderlandiyalik futbolchining “Real” safidagi harakatlari ko‘pchilik uchun esda qolarli bo‘lgan. Biroq hamma ham uning klasikodagi golini eslay olmasa kerak. 2007/08-yilgi mavsum chempionligini qo‘lga kiritishda Robben “Real”ga juda katta yordam beradi. O‘sha mavsumning ikkinchi davrasida jamoa katalonlarni 4:1 hisobida taslim etadi. Gollardan biriga Aryen mualliflik qiladi.

Fransesk Fabregas (“Barselona”)

Klasikodagi goli: 2011, 2013

Premyer Ligada haqiqiy dinamit hisoblangan Fabregas La Liga kelib “bengal uchquni”ga aylanib qolgandi. Garchi “Barselona”da uning Ispaniya terma jamoasidagi ko‘plab safdoshlari harakat qilsa ham, Seskning o‘zi hech “ko‘k-anorranglilar”ga kirishib keta olmadi. Biroq u ikki bor “El-Klasiko”da gol urdi, ikkalasi ham “Santyago Bernadeu”da yuz berdi!

Aleksis Sanches (“Barselona”)

Klasikodagi gollari: 2011, 2012, 2013

So‘nggi yillarning eng omadsiz o‘yinchilaridan biri bo‘lib turgan Aleksis Sanches katalonlar jamoasidagi muvaffaqiyatlarini hech qayerda takrorlay olmadi. Katalonlar hujum chizig‘ining ajralmas bo‘laklaridan biri bo‘lgan chililik futbolchi qatorasiga uch yil klasikolarda gol urgan.

Sami Xedira (“Real Madrid”)

Klasikodagi goli: 2012-yil

2011/12-yilgi mavsumning ikkinchi davrasidagi o‘yin “Real”ga peshqadamlikni mustahkamlash uchun juda muhim edi. Xedira uchrashuv avvalida Karles Puyolning ehtiyotkorsizligidan unumli foydalanib hisobni ochadi. Keyinchalik yuqorida tilga olingan Aleksis Sanches muvozanatni tiklaydi. Biroq oradan ko‘p vaqt o‘tmay Ronaldu to‘p kiritgan holda “Kamp Nou”ni tinchlanishga chaqirgan o‘sha mashhur uslubda gol nishonlashini amalga oshiradi.

Pepe (“Real Madrid”)

Klasikodagi goli: 2014-yil

Barcha portugaliyalik himoyachini “Barselona” hujumchilarining kushandasi sifatda yaxshi biladi. Biroq Pepe “El-Klasiko”larda nafaqat buzuvchi vazifasini o‘tagan, balki chiroyli golga ham mualliflik qilgan.

10-aprel tunida bizni yana bir “El-Klasiko” kutmoqda. Balki, bu o‘yinda ham yangi nomlar qarama-qarshilik tarixida o‘z nomini qoldirar…