Оуэн, Ибрагимович, Пепе. «Эль-Класико»ларда гол урган, бироқ мухлислар ёдидан кўтарилган 10 футболчи

Лионель Месси, Рауль, Луис Суарес, Серхио Рамос, Неймар, Криштиану Роналду, Хави, Карим Бензема, Луиш Фигу, Роберто Карлос, Роналду, Ривалдо ва Роналдиньо... Сайёрадаги энг улкан учрашув ҳисобланган «Эль-Класико»да гол урган футбол юлдузлари рўйхатини яна узоқ давом эттириш мумкин.

Ҳатто жамоаларнинг ҳозирги мураббийлари Рональд Куман ва Зинедин Зидан ҳам класиколарда гол урган. Зидан бу ишни уч марта қилган бўлса, Куман «Реал» дарвозасига бешта гол урган.

Шундай бўлса-да, «Эль-Класико»ларда гол урган, бироқ мухлислар ёдидан кўтарилиб кетган номлар талайгина. Бунга сабаб уларнинг айримлари машҳур тўпурар эмас, баъзилари эса бошқа клубда ўзини кўрсата олган. Қуйида XXI асрда класиколарда гол урган, бироқ кўпчиликнинг ёдидан чиқиб улгурган футболчилар ҳақида сўз юритамиз.

Николя Анелка («Реал Мадрид»)

Класикодаги голи: 2000 йил

Анелка исмини эшитганда кўпчилик унинг АПЛ клублари бўйлаб қилган «саёҳати»ни эслайди. Аксарият мухлислар унинг класикода гол ургани, тугул «Реал» сафида ҳаракат қилганини ҳам билмайди. Бироқ франциялик футболчи асрнинг илк «Эль-Класико»сида ўз номини таблога ёздириб қўя олган, ўшанда Мадрид шаҳри жамоаси ўз уйида «Барселона»ни 3:0 ҳисобида енгганди.

Жованни ван Бронкхорст («Барселона»)

Класикодаги голи: 2004 йил

Ван Бронкхорст «Арсенал»дан «Барселона»га йўл олган, бироқ у Марк Овермарс ёки Эммануэль Петидан фарқли ўлароқ каталонлар сафида муваффақиятга эришган. Франк Райкаард қўл остида ва Роналдиньо етакчилигида «уйғонаётган» «Барселона» Мадриддаги 2:1 ҳисобидаги ғалабадан кейин ўз уйида азалий рақибини 3:0 ҳисобида таслим этади. Жованни эса ушбу голларнинг иккинчисига муаллифлик қилади.

Майкл Оуэн («Реал Мадрид»)

Класикодаги голи: 2005 йил

«Реал» 2004/05 йилги мавсумнинг дастлабки қисмида «Барселона»дан 0:3 ҳисобидаги қақшатқич мағлубиятни қабул қилиб олади. Бироқ иккинчи даврада мадридликлар 4:2 ҳисобидаги ишончли ғалабани қўлга киритади. «Мадрид»нинг тўртинчи голига эса жамоа тарихидаги энг ёмон трансферлардан бири дея таърифланадиган Оуэн муаллиф бўлади.

Рууд ван Нистелрой («Реал Мадрид»)

Класикодаги голлари: 2007, 2008

Лионель Месси 2007 йилги класикода ҳет-трик қайд этган ҳолда ўзини бутун оламга кўз-кўз қилади. Аммо бу ўйин якунда 3:3 ҳисоби билан тугайди ва «Манчестер Юнайтед»нинг собиқ форварди бу баҳсда дублга муаллиф бўлади. Нидерландиялик футболчи Мадридда у қадар узоқ муддат ҳаракат қилмаган бўлса-да, юқори самарадорлик кўрсатган: у уч ярим мавсум давомида «Реал» сафида 96 ўйин ўтказиб, 64 та гол муаллифига айланди ва уларнинг учтаси «Эль-Класико»да киритилди.

Златан Ибрагимович («Барселона»)

Класикодаги голи: 2009 йил

Златан А Серия, Лига 1 ва MLS афсонаси ҳисобланади. Бироқ унинг Ла Лигадаги фаолияти у қадар муваффақиятли кечмаган. Бироқ швециялик юлдуз ўз номини «Эль-Класико» тарихига гол билан ёздириб қўя олган. 2009 йилдаги класикода Златан қанотдан узатилган тўпни дарвозага жойлаган ҳолда «Камп Ноу»ни ларзага келтиради ва бу гол учрашувда ягоналигини сақлаб қолади.

Арен Роббен («Реал Мадрид»)

Класикодаги голи: 2008 йил

Нидерландиялик футболчининг «Реал» сафидаги ҳаракатлари кўпчилик учун эсда қоларли бўлган. Бироқ ҳамма ҳам унинг класикодаги голини эслай олмаса керак. 2007/08 йилги мавсум чемпионлигини қўлга киритишда Роббен «Реал»га жуда катта ёрдам беради. Ўша мавсумнинг иккинчи даврасида жамоа каталонларни 4:1 ҳисобида таслим этади. Голлардан бирига Арен муаллифлик қилади.

Францэск Фабрегас («Барселона»)

Класикодаги голи: 2011, 2013

Премьер Лигада ҳақиқий динамит ҳисобланган Фабрегас Ла Лига келиб «бенгал учқуни»га айланиб қолганди. Гарчи «Барселона»да унинг Испания терма жамоасидаги кўплаб сафдошлари ҳаракат қилса ҳам, Сескнинг ўзи ҳеч «кўк-анорранглилар»га киришиб кета олмади. Бироқ у икки бор «Эль-Класико»да гол урди, иккаласи ҳам «Сантьяго Бернадеу»да юз берди!

Алексис Санчес («Барселона»)

Класикодаги голлари: 2011, 2012, 2013

Сўнгги йилларнинг энг омадсиз ўйинчиларидан бири бўлиб турган Алексис Санчес каталонлар жамоасидаги муваффақиятларини ҳеч қаерда такрорлай олмади. Каталонлар ҳужум чизиғининг ажралмас бўлакларидан бири бўлган чилилик футболчи қаторасига уч йил класиколарда гол урган.

Сами Хедира («Реал Мадрид»)

Класикодаги голи: 2012 йил

2011/12 йилги мавсумнинг иккинчи даврасидаги ўйин «Реал»га пешқадамликни мустаҳкамлаш учун жуда муҳим эди. Хедира учрашув аввалида Карлес Пуйолнинг эҳтиёткорсизлигидан унумли фойдаланиб ҳисобни очади. Кейинчалик юқорида тилга олинган Алексис Санчес мувозанатни тиклайди. Бироқ орадан кўп вақт ўтмай Роналду тўп киритган ҳолда «Камп Ноу»ни тинчланишга чақирган ўша машҳур услубда гол нишонлашини амалга оширади.

Пепе («Реал Мадрид»)

Класикодаги голи: 2014 йил

Барча португалиялик ҳимоячини «Барселона» ҳужумчиларининг кушандаси сифатда яхши билади. Бироқ Пепе «Эль-Класико»ларда нафақат бузувчи вазифасини ўтаган, балки чиройли голга ҳам муаллифлик қилган.

10 апрель тунида бизни яна бир «Эль-Класико» кутмоқда. Балки, бу ўйинда ҳам янги номлар қарама-қаршилик тарихида ўз номини қолдирар…