“Yuventus” hujumchisi Paulo Dibala PSJga yo‘l olishi mumkin.
Turinliklar klubi argentinalik forvardni PSJ hujumchisi Mauro Ikardiga almashtirmoqchi. “Yuventus” tez orada Ikardining turmush o‘rtog‘i va agenti Vanda Nara bilan uchrashish niyatida, deya xabar qilmoqda Football Italia.
Ta’kidlanishicha, Dibala va jamoa o‘rtasidagi munosabatlar keskinlikni saqlab qolmoqda. Tomonlar bir necha oylik muzokaralardan keyin ham shartnomani uzaytirish borasida kelisha olmadi.
Tuttosport nashrining xabariga ko‘ra, Dibalaning Turindan ketishi masalasi hali aniq emas. Klub vakillari futbolchining agenti bilan may oyida uchrashadi va Dibala bilan shartnomani uzaytirishga urinib ko‘radi. Bu muzokaralarda jamoaning Chempionlar Ligasi yo‘llanmasiga ega chiqa olishi asosiy rolni o‘ynaydi.
Dibalaning “Yuventus” bilan amaldagi shartnomasi 2022-yilning yozida o‘z nihoyasiga yetadi. Klub forvardni tekinga qo‘yib yubormaslik uchun u bilan kelishuvni uzaytirishi yoki ushbu yozda sotib yuborishi kerak.
27 yoshli futbolchi A Seriya joriy mavsumida 12 ta o‘yin o‘tkazib, uchta gol va ikkita golli uzatma muallifiga aylandi. Ikardi esa Liga 1 dagi 15 o‘yinda 5 gol va 3 assistni o‘z hisobiga yozdirib qo‘ydi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)