Amerikaning Zoom Video Communications kompaniyasi Rossiya va boshqa Mustaqil Davlatlar Hamdo‘stligining davlat tasarrufidagi kompaniya va tashkilotlariga onlayn konferensiya xizmatidan foydalanish huquqini to‘g‘ridan to‘g‘ri sotishini ma’lum qildi. Bu haqda Zoom’ning “Kommersant”da e’lon qilingan bayonotiga tayanib, Meduza xabar berdi.
“Zoom Rossiya va MDH mamlakatlaridagi mijozlarga xizmat ko‘rsatishga sodiq qoladi. Biz mazkur hududlardagi videokonferensaloqa xizmati bozoridagi yondashuvimizni rivojlantirish bosqichidamiz. Ayni paytda ham davlat, ham xususiy sektordagi yangi va avvaldan mavjud bo‘lgan foydalanuvchilar Zoom xizmatlarini sotib olish uchun to‘g‘ridan to‘g‘ri veb-saytimiz orqali so‘rov yuborishi mumkin”, — deyiladi bayonotda.
Avvalroq Zoom MDH mamlakatlari davlat sektoriga o‘z videoaloqasidan foydalanish huquqini sotishni taqiqlagan edi. Shuningdek, “Kommersant” Zoom’ning Rossiyadagi distribyutori RightConf kompaniyasi xatiga asoslanib, taqiq haqida xabar berdi. Kompaniya bosh direktori Andrey Petrenko hujjatning haqiqiyligini tasdiqladi. Shu tarzda universitetlar, davlat kompaniyalari va davlat idoralari Zoom korporativ aloqalaridan foydalana olmasligi, ularning videokonferensiyalari standart 40 daqiqa bilan cheklanishi ma’lum qilingan. Rossiya Milliy tadqiqot universiteti oliy iqtisodiyot maktabi 7-apreldan boshlab dastur xizmatlaridan foydalana olmasliklarini e’lon qildi.
Shuningdek, ekspertlar mahalliy yechimlar (masalan, Yandex) videokonferensaloqa bozorida Zoom o‘rnini bosishi mumkinligini aytgan. Mart oyi oxirida Rossiya Raqamli sanoat vazirligi rahbari Maqsut Shadayev Zoom’ning rus analogi 2022-yilda tayyor bo‘lishini aytgan edi.
Ma’lumot uchun, Zoom Video Communications videoaloqa xizmati 2011-yildan beri ishlab kelmoqda. Koronavirus pandemiyasi va o‘nlab hukumat muassasalarning o‘zini o‘zi izolyatsiya qilish choralari fonida Zoom’ning obro‘si keskin oshdi va millionlab foydalanuvchilar ushbu dasturdan foydalanishni boshladi.
Izoh (0)