Angrendagi “Birinchi rezinotexnika zavodi” MChJ shina zavodi ishi bo‘yicha tergov harakatlari boshlandi. Bu haqda Hisob palatasi raisining birinchi o‘rinbosari Bahodir Turobov O‘zLiDeP fraksiyasi yig‘ilishida ma’lum qildi.
Partiya yig‘ilishida deputat Doniyor G‘aniyev shina zavodi loyihasi to‘liq o‘ylanmagani va samarasiz faoliyat yuritayotgani masalasini ko‘tarib chiqqan. Uning so‘zlariga ko‘ra, zavodning kredit to‘lovlari bo‘yicha 3 million dollar miqdorida qarzdorligi mavjud.
U Hisob palatasi vakillariga murojaat qilib, loyiha tashabbuskorlarining kimligi va javobgar shaxslar qonun oldida javob berish-bermasligini so‘ragan.
Bahodir Turobov esa unga javoban yig‘ilgan materiallar Prezident Administratsiyasi topshirig‘i bilan huquqni muhofaza qilish organlariga topshirilganini ma’lum qilgan. Uning qo‘shimcha qilishicha, ayni paytda tergov harakatlari olib borilmoqda, barcha e’tirozlar vazirlik va idoralarga yetkazilgan.
Avvalroq Oliy Majlis Qonunchilik palatasi spiker o‘rinbosari Alisher Qodirov 156,4 million dollarga barpo etilgan zavod quvvatining 15 foizida ishlayotgani, sifati talabga javob bermagani uchun 100 mingta shina sotilmay qolgani, bu vaqt davomida UzAuto Motors 60 mln dollarga avtorezina import qilgani haqida xabar berilgandi.
Keyinroq “O‘zkimyosanoat” kompaniyasi izoh berib, past ko‘rsatkichlar koronavirus pandemiyasi bilan bog‘liq ekani, xomashyo importi cheklanib, bir necha marta ishlab chiqarish to‘xtab qolganini va sotuvlar pasayganini ma’lum qildi.
Izoh (0)