Xalq ta’limi vaziri Sherzod Shermatov maktablarda moddiy-texnik holat bo‘yicha muammolar ko‘pligi, yordam beraman desa, har kim o‘z imkoniyatidan kelib chiqib yordam berish yo‘llarini topa olishini, ammo ayrimlar faqat xato qidirishga harakat qilishini aytdi.
“Maktablardagi moddiy-texnik holat bo‘yicha yig‘ilib qolgan muammolarni ko‘pligini bilganimiz uchun ham barchani maktabga yordam berishga safarbar qilish harakatidamiz. Lekin ba’zilar bizning ichki dardimizni yuzimizga solib, o‘zini ko‘rsatishga harakat qilishdan nariga o‘ta olmayapti. Har qanday mansabdor shaxs — senatormi, deputatmi, vazirmi yoki boshqa rahbar agar haqiqatda prezidentimiz chaqiriqlariga ko‘ra maktabga yordam beraman desa, o‘z imkoniyatidan kelib chiqib ham yordam berish yo‘llarini topa oladi”, — degan u.
Vazirning ma’lum qilishicha, avvallari maktab ta’miriga asosan investitsiya dasturi orqali mablag‘ ajratilgan, hozir esa hududiy hokimliklar tasarrufida qoladigan mablag‘larning maktablarga ko‘proq ajratilishiga harakat bo‘lmoqda. Eng yaxshi ko‘rsatkichga ega hokimlarga minnatdorchilik sifatida esa “Ta’lim homiysi” ko‘krak nishoni ham joriy etilgan.
Sherzod Shermatov keyingi uchinchi manba homiylar va bitiruvchilar mablag‘lari ekanligini ta’kidladi. “Ko‘pgina bitiruvchilar maktablariga borib chin dildan yordam ko‘rsatdi. Ularning bu ko‘maklari uchun minnatdorlik bildiramiz”, — degan u.
Xalq ta’limi vaziri Prezident topshiriqlarini to‘g‘ri tushungan rahbarlar o‘z imkoniyatlaridan kelib chiqib, budjetdan tashqari mablag‘lar hisobiga maktablarga chin dildan yordam berishga harakat qilayotganini ham aytib o‘tgan.
“Yaqinda bir katta idora rahbari maktablarga qo‘shimcha televizorlar berish bo‘yicha tashabbus ko‘rsatdi, lekin yoritmanglar deganiga kimligini aytmay qo‘ya qolamiz”, — degan Sherzod Shermatov.
Bundan tashqari, u maktablarga ko‘mak beruvchi homiylar qatorida adliya vaziri ham borligini, u katta raqamlashtirish loyihasi tugaganidan keyin bo‘shagan 2,5 mingdan ortiq kompyuterlarni maktablarga o‘tkazishga yordam berganini ma’lum qildi.
“Maktablardagi muammolarimizni yuzimizga solish o‘rniga ularga yordam berish imkoniyatlarini topadigan shunday rahbarlar va insonlar ko‘payaversin”, — deb ta’kidlagan xalq ta’limi vaziri.
Izoh (0)