O‘zbekiston Energetika vazirligi va Phanes Group xalqaro kompaniyasi o‘rtasida Navoiy viloyati Nurota tumani hududida quyosh elektr stansiyasi (QES) qurish to‘g‘risida investitsiya shartnomasi imzolandi. Bu haqda vazirlik matbuot xizmati xabar berdi.
Ma’lum qilinishicha, tadbir davomida Phanes Group va “O‘zbekiston milliy elektr tarmoqlari” AJ o‘rtasida elektr energiyasini sotib olish to‘g‘risida bitim ham imzolangan.
Phanes Group va O‘zbekiston hukumati o‘rtasida QES (IA) va elektr energiyasini sotib olish to‘g‘risidagi bitim (PPA) 200 megavatt quvvatga ega bo‘lgan quyosh fotoelektr stansiyasini qurish, egalik qilish va ekspluatatsiya qilish uchun texnik va tijoriy shartlarni, shuningdek, 60 kilometr uzunlikdagi 220/110 kilovatt nimstansiyani o‘z ichiga oladi.
Ma’lumot uchun, Phanes Group bosh ofisi BAAning Dubay shahrida joylashgan bo‘lib, u quyosh energiyasi, shuningdek, investitsiya va aktivlarni boshqarish sohasida loyihalar ishlab chiqish va amalga oshirish bilan shug‘ullanuvchi xalqaro kompaniya hisoblanadi. Phanes Group 2012-yilda tashkil etilgan. Kompaniya moliyaviy va muhandislik tajribasini birlashtiradigan keng qamrovli yondashuvni amalga oshiradi. Buning natijasida, kompaniya quyosh energiyasi sohasida to‘liq tayyor yechimlarni taklif qiladi.
Phanes Group quyosh energiyasi sohasida sarmoyalar portfeliga ega va uning geografiyasi ko‘plab mamlakatlarni qamrab oladi. Kompaniya rivojlanayotgan bozorlarga, ayniqsa Afrika, Yaqin Sharq, Markaziy Osiyo va Mustaqil Davlatlar Hamdo‘stligi (MDH) mamlakatlariga alohida e’tibor qaratmoqda.
Bugungi kunga qadar kompaniyaning ekologik toza energiya bo‘yicha hissasi 130 megavattdan oshadi. Bundan tashqari, yana 3,5 gigavatt rivojlanish yoki rejalashtirish bosqichida, shu jumladan, Markaziy Osiyo va MDH mamlakatlarida 922 megavatt loyihalar portfelida.
Eslatib o‘tamiz, yanvar o‘rtalarida Masdar kompaniyasi Navoiyda quyosh fotoelektr stansiyasi qurishni boshlagani to‘g‘risida xabar berilgandi.
Izoh (0)