Халқ таълими вазири Шерзод Шерматов мактабларда моддий-техник ҳолат бўйича муаммолар кўплиги, ёрдам бераман деса, ҳар ким ўз имкониятидан келиб чиқиб ёрдам бериш йўлларини топа олишини, аммо айримлар фақат хато қидиришга ҳаракат қилишини айтди.
«Мактаблардаги моддий-техник ҳолат бўйича йиғилиб қолган муаммоларни кўплигини билганимиз учун ҳам барчани мактабга ёрдам беришга сафарбар қилиш ҳаракатидамиз. Лекин баъзилар бизнинг ички дардимизни юзимизга солиб, ўзини кўрсатишга ҳаракат қилишдан нарига ўта олмаяпти. Ҳар қандай мансабдор шахс — сенаторми, депутатми, вазирми ёки бошқа раҳбар агар ҳақиқатда президентимиз чақириқларига кўра мактабга ёрдам бераман деса, ўз имкониятидан келиб чиқиб ҳам ёрдам бериш йўлларини топа олади», — деган у.
Вазирнинг маълум қилишича, авваллари мактаб таъмирига асосан инвестиция дастури орқали маблағ ажратилган, ҳозир эса ҳудудий ҳокимликлар тасарруфида қоладиган маблағларнинг мактабларга кўпроқ ажратилишига ҳаракат бўлмоқда. Энг яхши кўрсаткичга эга ҳокимларга миннатдорчилик сифатида эса «Таълим ҳомийси» кўкрак нишони ҳам жорий этилган.
Шерзод Шерматов кейинги учинчи манба ҳомийлар ва битирувчилар маблағлари эканлигини таъкидлади. «Кўпгина битирувчилар мактабларига бориб чин дилдан ёрдам кўрсатди. Уларнинг бу кўмаклари учун миннатдорлик билдирамиз», — деган у.
Халқ таълими вазири Президент топшириқларини тўғри тушунган раҳбарлар ўз имкониятларидан келиб чиқиб, бюджетдан ташқари маблағлар ҳисобига мактабларга чин дилдан ёрдам беришга ҳаракат қилаётганини ҳам айтиб ўтган.
«Яқинда бир катта идора раҳбари мактабларга қўшимча телевизорлар бериш бўйича ташаббус кўрсатди, лекин ёритманглар деганига кимлигини айтмай қўя қоламиз», — деган Шерзод Шерматов.
Бундан ташқари, у мактабларга кўмак берувчи ҳомийлар қаторида адлия вазири ҳам борлигини, у катта рақамлаштириш лойиҳаси тугаганидан кейин бўшаган 2,5 мингдан ортиқ компьютерларни мактабларга ўтказишга ёрдам берганини маълум қилди.
«Мактаблардаги муаммоларимизни юзимизга солиш ўрнига уларга ёрдам бериш имкониятларини топадиган шундай раҳбарлар ва инсонлар кўпаяверсин», — деб таъкидлаган халқ таълими вазири.
Изоҳ (0)