O‘zbekistonda aprel oyidan boshlab, har shanba kuni Toshkent—Moskva—Toshkent yo‘nalishi bo‘yicha muntazam aviaqatnovlar qayta joriy etiladi, deb xabar bermoqda Uzbekistan Airways matbuot xizmati.
Qayd etishicha, mazkur reysga O‘zbekistonning barcha fuqarolari va Rossiya hukumatining 2020-yil 16-martdagi farmoyishi asosida Rossiyaga kirishga cheklov qo‘yilmagan O‘zbekistonda doimiy yashash huquqiga ega chet el fuqarolari kiritilishi mumkin.
Ushbu yo‘nalish bo‘yicha uchish uchun Rossiyaga kelishdan avval 3 kalendar kunidan oshmagan holda PZR-test (rus yoki ingliz tilida) o‘tkazish talab qilinadi.
“Tushunmovchiliklarning oldini olish uchun chiptalarni tezlashtirib xarid qilish xizmatlarini taklif qiluvchi shubhali shaxslarga murojaat etmasligingizni so‘raymiz. Chiptada ko‘rsatilgan va siz to‘lagan narxni taqqoslashingizni qattiq tavsiya etamiz”, — deyiladi xabarda
Avvalroq Rossiya 1-apreldan O‘zbekiston bilan muntazam aviaqatnovlarni tiklashi to‘g‘risida xabar berilgandi. Rossiyaning O‘zbekistondagi elchixonasi konsullik bo‘limi birinchi bosqichda faqat bitta — haftasiga bir marta Moskva—Toshkent yo‘nalishi amalga oshirilishini ma’lum qilgandi. Ushbu xabardan so‘ng Rossiyaga uchuvchi samolyot chiptalariga talab 165 foizga o‘sgandi.
Izoh (0)