O‘zbekiston Moliya vazirligi, “O‘ztransgaz”, Rossiya davlat taraqqiyot korporatsiyasi (VEB.RF), Rossiyaning eksport kreditlari va investitsiyalarini sug‘urtalash agentligi va “Gazprombank” O‘zbekistonda gaz transport tizimini modernizatsiya qilish loyihasi bo‘yicha hamkorlik qilishga kelishib oldi, deb xabar beradi “Gazeta.uz”.
Ma’lum qilinishicha, tomonlar 618 million dollargacha sindikatlangan kredit tashkil etish imkoniyatini ko‘rib chiqadi.
“VEB.RF Rossiya neft mahsulotlarini O‘zbekistonning neft va gaz sohasida targ‘ib qilish uchun sharoit yaratmoqda. Sindikatlangan kredit miqdorining kamida 50 foizi Rossiya mahsulot va xizmatlarining eksport to‘lovlari uchun sarflanadi”, — deydi “Rossiya davlat taraqqiyot korporatsiyasi raisi o‘rinbosari, boshqaruv a’zosi Daniil Algulyan.
Eslatib o‘tamiz, 2020-yil dekabr oyida VEB.RF, “Gazprombank” va “O‘zbekneftgaz” O‘zbekistonda uglevodorod ishlab chiqarishni ko‘paytirish dasturining ikkinchi bosqichini moliyalashtirish bo‘yicha hamkorlik qilishga kelishib olgan edi. Tabiiy gaz ishlab chiqarish hajmini oshirish maqsadida 2020-yil noyabr oyida kompaniyaning ishlab chiqarish quvvatlarini qurish va modernizatsiya qilish uchun Rossiya mahsulotlarini yetkazib berishni moliyalashtirishga 40 million yevrogacha kredit shartnomasi imzolangandi.
Avvalroq Toshkent shahrida “Innoprom. O‘zbekistonda katta sanoat haftaligi” xalqaro sanoat ko‘rgazmasi boshlangani, bosh vazir Abdulla Aripov ko‘rgazmaga tashrif buyurgan xorijiy mamlakatlar delegatsiyalari rahbarlarini qabul qilgani to‘g‘risida xabar berilgandi.
Izoh (0)