Toshkent shahar hokimligi Rossiya davlat taraqqiyot korporatsiyasi (VEB.RF guruhi) hamda “Rossiya eksport markazi” AJ o‘rtasida uch tomonlama kelishuv imzolandi, deb xabar beradi poytaxt hokimligi matbuot xizmati.
Hujjatga muvofiq, xalqaro hamkorlar Toshkent shahrining tegishli xizmatlari, jumladan, kommunal soha va yo‘l xizmatida foydalanilayotgan texnikalar parkini yangilash hamda kengaytirishda ishtirok etadi. Rossiya tomonidan 16,3 million dollarlik 130 dan ortiq texnikalarni yetkazib berish kutilmoqda.
“Gazeta.uz”ning yozishicha, “Rossiya eksport markazi” dasturni amalga oshirishga rossiyalik ishlab chiqaruvchilarni jalb etadi, texnikalarning bir qismi bevosita O‘zbekistonda UzAuto Trailer korxonalarida “KamAZ” bilan hamkorlikda yig‘iladi.
“Kommunal texnikalarni yetkazib berish sohasidagi potensial hamkorlik — 5 milliard rubldan ortiq (65 million dollar). O‘zbekiston VEB.RF’ning asosiy yo‘nalishlaridan biri, o‘zining ishonchliligini bir necha yildan buyon isbotlab kelayotgan sherik. Kommunal texnikalarni yetkazib berish hamkorligimizni mustahkamlaydi”, — deydi Rossiya davlat taraqqiyot korporatsiyasi raisi o‘rinbosari Daniil Algulyan.
“Toshkent shahar hokimligi bilan hamkorlik shahar infratuzilmasini rivojlantirish bo‘yicha ikki tomonlama rus—o‘zbek loyihalarini tom ma’noda barcha yo‘nalishlarida — uskunalar va texnik komplekslarni yetkazib berishdan tortib, ‘Aqlli shahar’ tizimlariga qadar amalga oshirish uchun katta istiqbollarni ochib beradi”, — deydi “Rossiya eksport markazi” bosh direktori Veronika Nikishina.
Izoh (0)