“Daryo”ni Telegram’da o‘qing! Join!
19:57, 22.02.2021 20117

Volontyorlar obodonlashtirish xizmati tomonidan to‘satdan unutilgan “SUM” qarshisidagi bog‘da hashar o‘tkazdi (foto)

Volontyorlar obodonlashtirish xizmati tomonidan to‘satdan e’tiborsiz qoldirilgan Toshkentdagi “SUM” qarshisida joylashgan bog‘da tozalash ishlarini amalga oshirdi. Aynan shu yerda mustaqillik stelasini bunyod etish rejalashtirilmoqda, deb xabar beradi “Podrobno”.

Foto: “Podrobno”

Noma’lum sabablarga ko‘ra, so‘nggi kunlarda obodonlashtirish xizmati xodimlari bog‘ga kelmay qo‘ygan. “Yodingizda bo‘lsa, bu yerga hokim kelishi aytilganida yuzdan ortiq xodimlar tezda to‘planib, nafaqat ko‘chalarni supurgan, balki yo‘llarni maxsus eritmalar bilan yuvgan edi”, — deyiladi xabarda. Biroq so‘nggi kunlarda ularning barchasi qayergadir g‘oyib bo‘lgan va bog‘da sekin-asta chiqindilar to‘plana boshlagan.

Shu sababli Toshkent aholisi nafaqat bog‘ni himoya qilishga, balki uni tozalashga ham kirishgan. Volontyorlar ijtimoiy tarmoqlar orqali bu borada befarq bo‘lmagan insonlarga murojaat bilan chiqdi.

“Do‘stlar! Ertaga soat 11:00 da sevimli bog‘imizda hashar tashkillashtirdik. So‘nggi vaqtlarda noma’lum sabablarga ko‘ra, bu yerni tozalamay qo‘yishdi. Biz, fuqarolar, o‘z shahrimiz haqida qayg‘urishga qodir ekanligimizni ko‘rsatib, namuna bo‘lishimiz kerak. Chiqindilar uchun paketlar, supurgi va tozalashda kerak bo‘ladigan boshqa asbob-anjomlar bilan kelamiz. Hayotimizni yanada yaxshi va yorqin qilamiz! Yig‘ilish joyi: ‘Moviy gumbazlar’ qahvaxonasi qarshisidagi o‘rindiq. Vaqt: soat 11:00…”, — deyiladi murojaatda.

21-fevral kuni ko‘plab odamlar ushbu chaqiriqqa javob tarzida bog‘ga kelgan. Kelganlarning har biri qo‘lidan kelgunicha yordam ko‘rsatgan.

Foto: “Podrobno”

Foto: “Podrobno”

Foto: “Podrobno”

Foto: “Podrobno”

Foto: “Podrobno”

“Poytaxt hokimligi obodonlashtirish xizmatining tushunarsiz ishiga e’tibor qaratishiga umid qilishdan boshqa iloj yo‘q. Yoki bog‘dagi tozalash ishlari ham endi faqat stela qurilganidan keyin amalga oshiriladimi?”, — deya qayd etiladi xabarda.

Eslatib o‘tamiz, O‘zbekiston mustaqilligining 30 yilligiga bag‘ishlab “Istiqlol” majmuasini qurish va unda “mustaqillikning mohiyati va ulkan tarixiy ahamiyatini aks ettiruvchi monumental kompozitsiya”ni yaratish Prezidentning 2020-yil 17-dekabrdagi farmonida ko‘zda tutilgan edi. Majmuani barpo etish joyi sifatida Sharof Rashidov, Islom Karimov va Afrosiyob ko‘chalari oralig‘ida, Markaziy univermag (SUM) qarshisidagi hudud tanlangan.

Avvalroq Jahongir Ortiqxo‘jayev “Istiqlol” majmuasini barpo etish masalasi yuzasidan aholi bilan uchrashgani va bog‘dagi bir dona daraxt kesilsa, o‘sha kuniyoq lavozimidan ketishga tayyorligini ma’lum qilgan edi. Shuningdek, poytaxt rahbari Toshkent shahar hokimligiga ishonchsizlik bildirayotganlarga javob qaytargandi.

Izoh qoldirishdan avval, qoidalar bilan tanishib oling: http://dy.uz/QbkeZ

Boshqa yangiliklar