Makro Samarqand Darvoza’dan rasman ketdi

Makro supermarketlar tarmog‘i (“Darvoza Savdo” MChJ) savdo-ko‘ngilochar markazini rasman tark etdi, deb xabar bermoqda Spot.

Bu Makro’ning da’volarini qondirishdan bosh tortgan Toshkent tumanlararo iqtisodiy sudining 24-fevraldagi qaroridan keyin yuz berdi.

7-yanvar kuni O‘zbekistondagi Carrefour brendini boshqaradigan Dubayning Majid al-Futtaim kompaniyasi Samarqand Darvoza va Compass’ga egalik qiluvchi UzOman fondi bilan ushbu savdo-ko‘ngilochar markazlarida Makro do‘konlari o‘rnida gipermarketlarni ochish to‘g‘risida shartnoma imzolaganini e’lon qildi.

Makro supermarketlar tarmog‘i boshqaruvchisi Roman Sayfulin buni Makro va uning xaridorlari uchun kutilmagan “sovg‘a” bo‘lganini aytgandi, “ayniqsa, yakunlanmagan shartnomalarni hisobga olganda”.

Kompaniya ularning huquqlari qo‘pol ravishda buzilgan deb hisoblagan — savdo va ko‘ngilochar markaz ijaraga berish shartlarini boshqa da’vogarlar bilan teng sharoitlarda taklif qilish majburiyati bo‘lgan.

8-yanvar kuni supermarketlar tarmog‘i ma’muriyatdan yangi muddatga, uchinchi shaxs bilan teng sharoitlarda shartnoma imzolash taklifini bildirishlarini talab qilgan, biroq ularga rad javobi berilgan. Muammoni hal qilib bo‘lmagani uchun kompaniya sudga murojaat qilgan. Shu bilan birga, yanvar oyi oxirida Samarqand Darvoza xodimlari Makro savdo maydonchasi va omborini elektr energiyasisiz qoldirgan.

Savdo markazining vakillari sudda Carrefour bilan shartnoma tuzilmaganligi va “Gazeta.uz”da e’lon qilingan xabarni (Carrefour Makro o‘rnini egallashi haqida) Makro ta’kidlayotgan ustun huquqni qo‘llash uchun yetarli asos deb hisoblamagan.

Shu munosabat bilan Makro 24-mart kuni Samarqand Darvoza’dagi joyini to‘liq bo‘shatdi va tashqi reklama konstruksiyalari olib tashlandi. Kompaniya shu bilan ushbu masala yopilganini ma’lum qildi.

Dastlab Samarqand Darvoza The Tower Mall Management Group’ga tegishli edi, ammo 2019-yildan buyon unga hamda Compas savdo-ko‘ngilochar markaziga O‘zbekiston—Ummon investitsiya kompaniyasi egalik qilib kelmoqda.

Avvalroq Carrefour savdo tarmog‘i boshqaradigan Majid al-Futtaim Hypermarkets Toshkentdagi yirik savdo maydonini taqsimlash bilan bog‘liq bahsli vaziyat sharoitida ta’sischilari va Akfa Group bilan munosabatlariga aniqlik kiritgandi.