Тошкент шаҳар ҳокимлиги Россия давлат тараққиёт корпорацияси (VEB.RF гуруҳи) ҳамда «Россия экспорт маркази» АЖ ўртасида уч томонлама келишув имзоланди, деб хабар беради пойтахт ҳокимлиги матбуот хизмати.
Ҳужжатга мувофиқ, халқаро ҳамкорлар Тошкент шаҳрининг тегишли хизматлари, жумладан, коммунал соҳа ва йўл хизматида фойдаланилаётган техникалар паркини янгилаш ҳамда кенгайтиришда иштирок этади. Россия томонидан 16,3 миллион долларлик 130 дан ортиқ техникаларни етказиб бериш кутилмоқда.
«Gazeta.uz»нинг ёзишича, «Россия экспорт маркази» дастурни амалга оширишга россиялик ишлаб чиқарувчиларни жалб этади, техникаларнинг бир қисми бевосита Ўзбекистонда UzAuto Trailer корхоналарида «КамАЗ» билан ҳамкорликда йиғилади.
«Коммунал техникаларни етказиб бериш соҳасидаги потенциал ҳамкорлик — 5 миллиард рублдан ортиқ (65 миллион доллар). Ўзбекистон VEB.RF’нинг асосий йўналишларидан бири, ўзининг ишончлилигини бир неча йилдан буён исботлаб келаётган шерик. Коммунал техникаларни етказиб бериш ҳамкорлигимизни мустаҳкамлайди», — дейди Россия давлат тараққиёт корпорацияси раиси ўринбосари Даниил Алгулян.
«Тошкент шаҳар ҳокимлиги билан ҳамкорлик шаҳар инфратузилмасини ривожлантириш бўйича икки томонлама рус—ўзбек лойиҳаларини том маънода барча йўналишларида — ускуналар ва техник комплексларни етказиб беришдан тортиб, ‘Ақлли шаҳар’ тизимларига қадар амалга ошириш учун катта истиқболларни очиб беради», — дейди «Россия экспорт маркази» бош директори Вероника Никишина.
Изоҳ (0)