Samarqand shahrida 2-aprel kuni institut o‘qituvchisi 21 yoshli qizdan shaxsiy fotosuratlarni tarqatib yubormaslik uchun 400 dollar talab qildi. Bu haqda Tergov departamenti xabar berdi.
Ma’lum qilinishicha, 2-aprel kuni Samarqand shahri bo‘yicha ichki ishlar organlari faoliyatini muvofiqlashtirish bo‘limiga 21 yoshli S.A. ariza bilan murojaat qilib, bu haqda ma’lum qilgan. Unda unga tegishli sir saqlanishi lozim bo‘lgan fotosuratlarini obro‘li institutlardan birida o‘qituvchi bo‘lib ishlovchi tanishi 27 yoshli V.F. ijtimoiy tarmoqlarda tarqatib yubormaslik evaziga 400 AQSh dollari talab qilayotganini bildirgan.
Shu kuni soat 13:00 da Samarqand shahri “Qo‘shhovuz” mahallasi hududida V.F. 400 dollarni S.A.dan tovlamachilik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Samarqand shahri bo‘yicha IIO FMB huzuridagi tergov bo‘limi tomonidan V.F.ga nisbatan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilib, gumon qilinuvchi tariqasida jalb qilingan. Hozirda tergov harakatlari olib borilmoqda.
Bundan avval namanganlik erkak bilan Telegram’da yolg‘ondan ishqiy munosabatga kirishib, so‘ngra ushbu yozishmalarni tarqatmaslik evaziga undan 1000 dollar so‘ragan ayol ushlangani, bekobodlik ayolning eski Telegram akkauntidagi shaxsiy rasmlarini internetda tarqatib yubormaslik uchun undan 5 million so‘m so‘ragan 15 yoshli qiz ushlangani hamda Xorazmda ayolning shaxsiy videotasvirlarini qarindoshlariga ko‘rsatish bilan qo‘rqitib, undan 1,5 ming dollar va telefon talab qilgan yigit ushlangani haqida xabar berilgandi.
Izoh (0)