Қашқадарё вилоятининг Миришкор туманидаги Гулистон қишлоғида 10 гектар ер майдонига эга ҳудудда «Ёшлар шаҳарчаси» ташкил этилди. Бу ҳақда «Дарё»га туман ҳокимлиги ахборот хизмати раҳбари Азизбек Яздурдиев маълум қилди.
Ёшлар шаҳарчаси очилишида иштирок этган туман ҳокими Шерали Санаев ҳудуд фақатгина пахта терими мавсумида икки ой теримчилар учун хизмат қилганини таъкидлаган.
«Туман ҳокими мазкур ҳудуд 10 йил давомида фойдаланилмасдан келинганини, шунингдек, вилоят раҳбари Зоир Мирзаевнинг туманга ташрифи чоғида ҳудудни янада обод қилиш ва самарали фойдаланиш лозимлиги ҳақида топшириқ берилганини эсга олиб, ‘Ёшлар шаҳарчаси’ қурилгани миришкорликлар учун қувончли бўлганини билдирди», — дейди Азизбек Яздурдиев.
Маълумот берилишича, шаҳарча очилган куни ҳудудда 120 ўринли трикотаж маҳсулотларини ишлаб чиқарувчи «Mirishkor textile group» корхонаси ҳам ўз фаолиятини бошлаган. Корхонада 100 дан ортиқ «Аёллар ва ёшлар» дафтарига киритилган хотин-қизларнинг бандлиги таъминланган.
Шунингдек, шаҳарчада 60 ўринли 20-сонли боғча, 3 нафар хотин-қиз бандлигини таъминлаган гўзаллик салони, 5 нафар хотин-қизни ишли қилган нон ва нон маҳсулотлари ишлаб чиқарувчи «Миришкор экспорт» хусусий корхонаси, аниқ ва табиий фанлар, инглиз ҳамда француз тилларидан ёшларга қўшимча дарс беришга ихтисослашган «Бўлажак талаба» ўқув маркази ҳамда туман Аҳоли бандлигига кўмаклашиш маркази томонидан ташкил этилган касб-ҳунарга ўқитиш маркази иш бошлаган.
Изоҳ (0)