Jamoat transporti haydovchilari tushum rejasidan ozod qilinib, ularga bosib o‘tgan har bir kilometriga qarab pul to‘lanadi. Bu haqda kompaniyaning loyihalari, tashqi aloqalar va investitsiyalar bo‘limi boshlig‘i Shahboz G‘ofurovga asoslanib “Podrobno.uz” xabar qildi.
“Ha, ayrim haydovchilarning antennani o‘chirib qo‘yishi yoki o‘rnatilgan GPS-trekerning modifikasiyasini o‘zgartirishi kabi holatlar uchrab turadi. Buning sabablaridan biri tushum rejasidir. Ya’ni haydovchilar tushum rejasini bajarish uchun ayrim hollarda qoidaga zid tarzda ish tutadi”, — deb ta’kidlagan u.
Shahboz G‘ofurovning so‘zlariga ko‘ra, ushbu yo‘nalishda loyiha ishlab chiqilgan bo‘lib, unga ko‘ra, kelajakda haydovchilar xizmati uchun ular bosib o‘tgan kilometrga qarab haq to‘lash amalga oshiriladi. Ya’ni haydovchilar yo‘lkira uchun pul yig‘ishdan ozod qilinadi. Ular faqat reyslar harakati jadvali va intervaliga rioya qilishlari lozim bo‘ladi.
Bundan tashqari, avtobuslarning, ayniqsa kechqurun jadvalga muvofiq harakatlanishini bevosita nazorat qiladigan dispetcherlik markazi faoliyati takomillashtiriladi.
Izoh (0)