Buxoro viloyati Kogon shahrida koronavirusga qarshi kurashda bemorlar bilan ishlagan 76 nafar tibbiyot xodimiga 88 million so‘mdan ortiq 6 foizli qo‘shimcha to‘lovlar to‘lab berilmagani aniqlandi, deb xabar beradi O‘zA.
Adliya bo‘limi tomonidan Kogon shahar tibbiyot birlashmasida o‘tkazilgan monitoring natijasida koronavirusga qarshi kurashish bo‘yicha bemorlar bilan ishlash bo‘yicha 76 nafar tibbiyot birlashmasi xodimlari jalb etilganligi, biroq ushbu xodimlarining jami 88 mln 389 ming so‘mlik 6 foizli qo‘shimcha to‘lovlari to‘lanmasdan qolganligi aniqlangan.
Ta’kidlanishicha, farmonining 17-bandi Moliya vazirligi, Bandlik va mehnat munosabatlari vazirligi Sog‘liqni saqlash vazirligi bilan birgalikda tibbiyot, sanitariya-epidemiologik va boshqa xodimlar koronavirus infeksiyasi tarqalishiga qarshi kurashish tadbirlariga jalb qilinadigan davrda ularning oylik lavozim maoshiga 6 foiz miqdorida har kunlik qo‘shimcha to‘lovlar to‘lab berish topshirilgan.
“Adliya bo‘limi tomonidan aniqlangan qonun hujjatlarining buzilishi holatlari va ularning sabablari va bunga olib keluvchi shart-sharoitlarni bartaraf etish yuzasidan shahar tibbiyot birlashmasiga taqdimnoma kiritildi. Biroq shahar tibbiyot birlashmasi rahbariyati tomonidan 6 foizli qo‘shimcha to‘lovlar to‘lab berilmagach, Fuqarolik protsessual kodeksining 171-moddasi 5-bandiga asosan, ya’ni hisoblangan, lekin xodimga to‘lanmagan ish haqini va unga tenglashtirilgan to‘lovlarni undirish maqsadida Fuqarolik ishlari bo‘yicha Kogon tumanlararo sudiga qarzdordan qo‘shimcha to‘lov undirish haqidagi ariza kiritildi”, – deydi Kogon shahar adliya bo‘limi bosh maslahatchisi Nodir Hoshimov.
Kiritilgan ta’sir choralari natijasida jami 76 nafar tibbiyot birlashmasi xodimlariga yuqorida keltirilgan 6 foizli qo‘shimcha to‘lovlari to‘lab berilishi ta’minlangan.
Avvalroq Toshkentda koronavirusga chalingan hamshiradan olib qolingan 12 million so‘m miqdoridagi soliq to‘lovlari undirib berilgani, Nukusda koronavirusga chalinganlar kasalxonasida ishlagan ikki hamshiraning rag‘batlantirish pullari to‘lab beriladigan bo‘lgani to‘g‘risida xabar berilgandi.
Ma’lumot uchun, O‘zbekistonda koronavirus infeksiyasidan zararlangan bemorlar bilan muloqotga kirishadigan, zararlangan bemorlar joylashtirilgan obyektlarda hamda koronavirus infeksiyasini aniqlash laboratoriyalarida faoliyat olib borayotgan tibbiyot xodimlariga har 14 kunlik faoliyat davri uchun maxsus qo‘shimcha rag‘batlantirish to‘lovi belgilangan. Shuningdek, bemorlar bilan ishlash davomida koronavirus infeksiyasini yuqtirib olgan tibbiyot, sanitariya-epidemiologiya xizmati va boshqa xodimlarga 100 million so‘mdan to‘lanadi.Koronavirus infeksiyasiga qarshi kurashish doirasida bemorlar bilan ishlagan vaqtida koronavirus infeksiyasini yuqtirish natijasida og‘ir ahvolga tushgan va sog‘lig‘i tiklanmagan taqdirda tibbiyot, sanitariya-epidemiologiya xizmati va boshqa xodimlarga yoki ularning oila a’zolariga esa 250 million so‘m miqdorida bir martalik to‘lovlar to‘lanadi.
Izoh (0)