2021 йил баҳорининг энг йирик воқеаларидан бири бўлиши кутилаётган «Тошкент Беш ташаббус ҳаракати» доирасидаги тадбирларда иштирок этиш учун ҳозиргача 3 мингдан зиёд йигит-қизлар рўйхатдан ўтди. Бу ҳақда тадбир ташкилотчилари «Дарё»га маълум қилди. Шунингдек, яна 3 минг киши меҳмон сифатида рўйхатдан ўтган.
Уларнинг 1,8 мингдан ортиғи спорт тадбирларида иштирок этиш истагини билдирган. Жумладан, Laser Run замонавий бешкураш қоидалари асосидаги мусобақаларда қатнашиш учун 120 киши рўйхатдан ўтган.
Блогер ва мусиқачи Никита Макаренко раҳбарлигида ўтказиладиган Tashkent Voice Fest вокал ижрочилар танловида қатнашиш учун ҳозирга қадар 100 дан ортиқ, Street Art граффити рассомлар танловида иштирок этиш учун 38 та ариза келиб тушган, хореограф Сергей Злотников раҳбарлик қиладиган Tashkent Dance Fest рақс фестивалида ҳозирча 80 киши ўз маҳоратини кўрсатиш истагини билдирган.
Аввал хабар берилганидек, Тошкент шаҳар ҳокимлиги томонидан ташкил этилаётган «Тошкент Беш ташаббус ҳаракати» доирасида таниқли блогер Хушнудбек Худойбердиев раҳбарлигида «Заковат» интеллектуал турнири ҳам бўлиб ўтади. Ҳозиргача ушбу билимлар мусобақасида иштирок этиш учун 200 дан ортиқ жамоа ариза берди.
«Тошкент Беш ташаббус ҳаракати» тадбирларини ўтказиш учун пойтахт марказида 37,5 минг квадрат метр майдонда «шаҳар ичидаги махсус шаҳар» бунёд этилмоқда. Унинг декорациялари енгил конструкциялардан шакллантирилмоқда. Мазкур ёшлар фестивалида нафақат иштирокчи, балки оддий меҳмон сифатида ҳам қатнашиш мумкни. Бунинг учун ҳаракатнинг расмий сайти — www.toshkent21.uz сайтида рўйхатдан ўтиш керак.
Изоҳ (0)