Ukrainada tarix darsliklaridagi mamlakat xaritalari Qrim yarimoroli ko‘rsatilmagan holda nashr etildi. Bu haqda “Ukrainskaya pravda” nashrining sho‘ba loyihasi bo‘lgan “Istoricheskaya pravda” xabar berdi, deb yozmoqda “RBK”.
“Shunday qilib, ‘Ukraina tarixi. Umumiy o‘rta ta’lim muassasalarining 10-sinflari uchun o‘quv qo‘llanma. (Me’yoriy daraja), muallif: O.K.Strukevich, nashriyot: ‘Gramota’, 2018’ darsligida Ukraina xaritasining Qrim yarimorolisiz tasvirlanganini aniq ko‘rish mumkin”, — deyiladi xabarda. Maqolada kitobning skaner qilingan qismlari taqdim etilgan. Maqola mualliflarining ta’kidlashicha, to‘qqizinchi sinf o‘quvchilari uchun nashr qilingan darsliklarning xaritalarida ham Qrim ko‘rsatilmagan.
2020-yilning noyabr oyida Qrim BMW avtomobillarining navigatsiya tizimlarida Rossiyaning bir qismi sifatida tasvirlana boshladi. O‘shanda kompaniya rasmiylarining aytishicha, xarita ma’lumotlarini yangilashda, mashina sotib olingan yoki foydalaniladigan davlat qonunchiligi inobatga olinadi. Lekin agar mijoz avtomobildan boshqa yurisdiksiyalarda foydalansa, sozlamalarni almashtirishi mumkin, deb ta’kidladi BMW kompaniyasi.
Ma’lumot uchun, Ukraina prezidenti Vladimir Zelenskiy mamlakat Qrimni qaytarib olishiga ishonch bildirgan edi. U bu haqda Facebook’da joylashtirilgan, Ukrainada bugun nishonlanayotgan qrim-tatar xalqi genotsidi qurbonlarini xotirlash kuni munosabati bilan qilgan murojaatida aytib o‘tgan.
Shu bilan birga, Vladimir Zelenskiy Qrimni qaytarish mamlakat milliy g‘oyasining ajralmas bo‘lagi bo‘lishini qayd etdi. 26-fevralni “Qrim va Sevastopol qamaliga qarshi kurash kuni” sifatida nishonlash to‘g‘risidagi farmonni ham imzolaganini ma’lum qilgan.
“So‘zimni oddiy, isbot talab qilinmaydigan aksiomalardan boshlamoqchiman. Hafta yetti kundan iborat, Yer shar shaklida, Qrim — bu Ukraina. Qrimni qaytarish milliy g‘oyamizning asosiy va ajralmas qismlaridan biri bo‘ladi”,— deya ta’kidlagan Zelenskiy Age of Crimea forumida.
Shu o‘rinda, Yevropa Ittifoqining tashqi siyosiy xizmati Rossiya prezidenti Vladimir Putinning Qrim va Sevastopolning aksariyat hududlarida chet el fuqarolari uchun yerga egalik qilishni taqiqlovchi farmonini tanqid qildi.
Izoh (0)