Украинада тарих дарсликларидаги мамлакат хариталари Қрим яримороли кўрсатилмаган ҳолда нашр этилди. Бу ҳақда «Украинская правда» нашрининг шўъба лойиҳаси бўлган «Историческая правда» хабар берди, деб ёзмоқда «РБК».
«Шундай қилиб, ‘Украина тарихи. Умумий ўрта таълим муассасаларининг 10-синфлари учун ўқув қўлланма. (Меъёрий даража), муаллиф: О.К.Струкевич, нашриёт: ‘Грамота’, 2018’ дарслигида Украина харитасининг Қрим яриморолисиз тасвирланганини аниқ кўриш мумкин», — дейилади хабарда. Мақолада китобнинг сканер қилинган қисмлари тақдим этилган. Мақола муаллифларининг таъкидлашича, тўққизинчи синф ўқувчилари учун нашр қилинган дарсликларнинг хариталарида ҳам Қрим кўрсатилмаган.
2020 йилнинг ноябрь ойида Қрим BMW автомобилларининг навигация тизимларида Россиянинг бир қисми сифатида тасвирлана бошлади. Ўшанда компания расмийларининг айтишича, харита маълумотларини янгилашда, машина сотиб олинган ёки фойдаланиладиган давлат қонунчилиги инобатга олинади. Лекин агар мижоз автомобилдан бошқа юрисдиксияларда фойдаланса, созламаларни алмаштириши мумкин, деб таъкидлади BMW компанияси.
Маълумот учун, Украина президенти Владимир Зеленский мамлакат Қримни қайтариб олишига ишонч билдирган эди. У бу ҳақда Facebook’да жойлаштирилган, Украинада бугун нишонланаётган қрим-татар халқи геноциди қурбонларини хотирлаш куни муносабати билан қилган мурожаатида айтиб ўтган.
Шу билан бирга, Владимир Зеленский Қримни қайтариш мамлакат миллий ғоясининг ажралмас бўлаги бўлишини қайд этди. 26 феврални «Қрим ва Севастополь қамалига қарши кураш куни» сифатида нишонлаш тўғрисидаги фармонни ҳам имзолаганини маълум қилган.
«Сўзимни оддий, исбот талаб қилинмайдиган аксиомалардан бошламоқчиман. Ҳафта етти кундан иборат, Ер шар шаклида, Қрим — бу Украина. Қримни қайтариш миллий ғоямизнинг асосий ва ажралмас қисмларидан бири бўлади»,— дея таъкидлаган Зеленский Age of Crimea форумида.
Шу ўринда, Европа Иттифоқининг ташқи сиёсий хизмати Россия президенти Владимир Путиннинг Қрим ва Севастополнинг аксарият ҳудудларида чет эл фуқаролари учун ерга эгалик қилишни тақиқловчи фармонини танқид қилди.
Изоҳ (0)