Farg‘onada qaynukasi mashinasini olib ketgani uchun ayoli bilan janjallashgan mast erkak o‘zini poyezd ostiga tashlashga urindi

Farg‘ona viloyati Uchko‘prik tumanida 10-mart kuni erkak mast holatda qaynukasi uning avtomashinasini olib ketgani sababli o‘zini poyezd tagiga tashlamoqchi bo‘lgan. Bu haqda “Sevimli” telekanalining “Zamon” informatsion dasturida xabar berildi.

Ma’lum bo‘lishicha, “Qayrag‘och” qishlog‘ida yashovchi erkak spirtli ichimlik iste’mol qilgani sababli uning turmush o‘rtog‘i ukasiga qo‘ng‘iroq qilib uydagi mashinani olib ketishini so‘ragan. Ayolning ta’kidlashicha, u buni mastlik sababli biror baxtsiz hodisa bo‘lishidan xavotirlanib amalga oshirgan.

“Mashinani nimaga olib ketadi, nima haqqi bor? Mening erkaklik g‘ururim yo‘qmi? Uydan temiryo‘lga chiqdim” — deydi erkak.

Holatdan xabar topgan mahalla mutasaddilari Ichki ishlar boshqarmasiga murojaat qilgan. Patrul-post xizmati xodimlari hududga yetib kelganida temiryo‘lning 13—14-kilometrlarida erkakning mast, agressiv holatda yurgani aniqlangan.

Qayd etilishicha, u to‘xtatib qolinganidan taxminan 3–5 daqiqadan o‘tib, ushbu yo‘ldan yuk poyezdi o‘tgan. Erkak mastlik holatini aniqlash va reabilitatsiya qilish uchun voqea joyidan olib ketilgan.

Erkakning aytishicha, hozirda u ichish va chekishni to‘xtatib, fermer xo‘jaliklarining birida traktor haydovchisi bo‘lib ishlab kelmoqda.

Avvalroq Namanganda naushnik taqib, temiryo‘l bo‘ylab harakatlangan 19 yoshli yigitni poyezd urib ketgani, Toshkent viloyatida naushnik taqib, temiryo‘l bo‘ylab harakatlangan ikki ayolni poyezd urib ketgani va ulardan biri voqea joyida vafot etgani to‘g‘risida xabar berilgandi.