Фарғона вилояти Учкўприк туманида 10 март куни эркак маст ҳолатда қайнукаси унинг автомашинасини олиб кетгани сабабли ўзини поезд тагига ташламоқчи бўлган. Бу ҳақда «Севимли» телеканалининг «Замон» информацион дастурида хабар берилди.
Маълум бўлишича, «Қайрағоч» қишлоғида яшовчи эркак спиртли ичимлик истеъмол қилгани сабабли унинг турмуш ўртоғи укасига қўнғироқ қилиб уйдаги машинани олиб кетишини сўраган. Аёлнинг таъкидлашича, у буни мастлик сабабли бирор бахтсиз ҳодиса бўлишидан хавотирланиб амалга оширган.
«Машинани нимага олиб кетади, нима ҳаққи бор? Менинг эркаклик ғурурим йўқми? Уйдан темир йўлга чиқдим» — дейди эркак.
Ҳолатдан хабар топган маҳалла мутасаддилари Ички ишлар бошқармасига мурожаат қилган. Патруль-пост хизмати ходимлари ҳудудга етиб келганида темир йўлнинг 13—14-километрларида эркакнинг маст, агрессив ҳолатда юргани аниқланган.
Қайд этилишича, у тўхтатиб қолинганидан тахминан 3–5 дақиқадан ўтиб, ушбу йўлдан юк поезди ўтган. Эркак мастлик ҳолатини аниқлаш ва реабилитация қилиш учун воқеа жойидан олиб кетилган.
Эркакнинг айтишича, ҳозирда у ичиш ва чекишни тўхтатиб, фермер хўжаликларининг бирида трактор ҳайдовчиси бўлиб ишлаб келмоқда.
Аввалроқ Наманганда наушник тақиб, темир йўл бўйлаб ҳаракатланган 19 ёшли йигитни поезд уриб кетгани, Тошкент вилоятида наушник тақиб, темир йўл бўйлаб ҳаракатланган икки аёлни поезд уриб кетгани ва улардан бири воқеа жойида вафот этгани тўғрисида хабар берилганди.
Изоҳ (0)