Samarqandda yuk poyezdi urib yuborgan 11-sinf o‘quvchisi ko‘rsatilgan tibbiy yordamga qaramasdan vafot etdi

Samarqand viloyatining Kattaqo‘rg‘on tumanida 11-sinf o‘quvchisini yuk poyezdi urib yubordi. Bu haqda “Daryo”ga viloyat IIB Transportda xavfsizlikni ta’minlash boshqarmasi ma’lum qildi.

Ma’lum bo‘lishicha, 2021-yilning 18-mart kuni soat taxminan 07:53 da Kattaqo‘rg‘on-28 razyezd temiryo‘l bekatlari oralig‘ining 3803-kilometr 7-piketida “Qushbegi” mahallasida yashagan, 35-maktabning 11-sinf o‘quvchisi E.B.ni yuk poyezdi urib yuborgan.

Fuqaro E.B. temiryo‘lda harakatlanib kelayotgan yuk poyezdini o‘tkazib, keyin yo‘lda davom etish uchun temiryo‘l yonida turgan. U orqadan kelayotgan sinfdoshlarini kutib turganida yon sumkasi yuk poyezdiga tegib, poyezd uni sudrab ketgan. Natijada o‘quvchi bosh qismidan jarohat olib, tuman markaziy shifoxonasiga yotqizilgan. Olib borilgan tibbiy muolajalarga qaramay, shu kuni vafot etgan.

Mazkur holat mahalla va ta’lim muassasasida jamoatchilik ishtirokida muhokama etilib, tergovga qadar tekshiruv harakatlari olib borilmoqda.

Samarqand viloyat IIB Transportda xavfsizlikni ta’minlash boshqarmasi temiryo‘lda harakatlanadigan yo‘lovchilar va haydovchilarni temiryo‘lda xavfsizlik qoidalariga rioya qilishga, diqqat va e’tiborli bo‘lishga chaqirgan.