30-mart kuni kechasi Sirdaryo viloyatining Sardoba tumani “Paxtakor” mahallasiga yaqin joy va Jizzax viloyatining Zarbdor tumanlari chegara qismida kuchli gumburlash ovozi eshitilgani to‘g‘risida xabar berilgandi. Energetika vazirligining ma’lum qilishicha, gumburlash ovozi magistral gaz quvurining yorilishi oqibatida yuzaga kelgan.
Ma’lumotlarga ko‘ra, Jizzax viloyati Zarbdor tuman Nurafshon shirkat xo‘jaligi hududidan o‘tgan diametri 1020 millimetr bo‘lgan Paxtakor—Yangiyer magistral gaz quvuri I tarmog‘i 30-kilometrida yong‘insiz quvur yorilishi sodir bo‘lgan.
Ta’kidlanishicha, tezkorlik bilan holat yuzasidan vakolatli organlarga xabar berilgan. Natijada soat 22:25 da “O‘ztransgaz” AJ markaziy dispetcherlik xizmati ko‘rsatmasi bilan Paxtakor—Yangiyer magistral gaz quvurining 19 va 54-kilometrlarida berkitish moslamalari to‘liq yopilgan.
Yorilish natijasida jarohatlangan yoki jabrlanganlar yo‘q.
Soat 00:00 atrofida maxsus brigada zaruriy avariya tiklash texnika vositalari bilan voqea joyiga yetib borgan. Avariya oqibatlarini bartaraf etish, magistral gaz quvuri faoliyatini tezkorlik bilan tiklash maqsadida shtab tashkillashtirilgan.
Ma’lum qilinishicha, energetika vaziri Alisher Sultonov hodisa ko‘lami va uni bartaraf etish yuzasidan ko‘rilayotgan chora-tadbirlarni bevosita o‘rganish hamda tegishli chora ko‘rish uchun zudlik bilan voqea joyiga yetib borgan.
“Ayni paytda avariya tiklash ishlari olib borilmoqda. Hozirda uzunligi 36 metr bo‘lgan quvur montaj qilinyapti. Mazkur jarayonga malakali mutaxassislar hamda barcha zarur texnika vositalari jalb qilingan”, — deyiladi xabarda.
Qayd etilishicha, mazkur magistral gaz quvuri 1984-yilda ishga tushirilgan bo‘lib, ayni paytda hodisa sabablari o‘rganilmoqda.
Eslatib o‘tamiz, dekabr oxirlarida Gulistonda ikki marta kuchli gumburlash ovozi eshitilgandi. Keyinroq FVV Seysmoprognostik monitoring Respublika markazi bu zilzila oqibatida yuzaga kelgani, zilzila o‘chog‘i yer yuzasiga yaqin bo‘lgani sababli gumburlash ovozi eshitilganini ma’lum qilgan edi.
Izoh (0)