Apple mustaqil servis markazlari dasturini (IRP) yana 200 dan ortiq mamlakatga, jumladan, O‘zbekistonga ham kengaytirmoqda. Bu haqda kompaniya saytiga tayanib, Spot xabar berdi.
IRP doirasida kompaniyalar ehtiyot qismlarni Apple’ning vakolatli xizmat ko‘rsatish markazlari bilan bir xil narxda olishi mumkin. Shuningdek, korporatsiya asbob-uskunalar, qo‘llanmalar, diagnostika va bepul o‘qitish bilan ta’minlaydi.
Dastur bosqichma-bosqich kengaytiriladi — O‘zbekiston ikkinchi to‘lqindan o‘rin olgan, servis markazlar yil oxirlarida IRP sifatida ro‘yxatdan o‘tkazish bo‘yicha ariza berishi mumkin.
Mustaqil servis markazlar dasturi 2019-yili AQShda ishga tushirilgan bo‘lib, hozirda undan AQSh, Kanada va Yevropadagi 1500 ta ta’mirlash markazlari foydalanmoqda. Apple dasturni “kompaniya mahsulotlari sotiladigan deyarli barcha mamlakatlarga” kengaytirishni reja qilgan.
Dastur shartlari oshkor etilmagan. Vice ma’lumotlariga ko‘ra, ishtirokchilar Apple tomonidan amalga oshiriladigan kutilmagan tekshiruvlarga rozi bo‘lishi kerak. Agarda markazni tekshirish vaqtida original bo‘lmagan ehtiyot qismlar topilsa, Apple jarima belgilashi mumkin.
Eslatib o‘tamiz, 2021-yilning yanvar oyida Axborot texnologiyalari va kommunikatsiyalarini rivojlantirish vazirligi axborot xizmati rahbari Sherzod Ahmatov O‘zbekistonda Apple kompaniyasining rasmiy ofislari ochilishini ma’lum qilgandi.
Izoh (0)