30 март куни кечаси Сирдарё вилоятининг Сардоба тумани «Пахтакор» маҳалласига яқин жой ва Жиззах вилоятининг Зарбдор туманлари чегара қисмида кучли гумбурлаш овози эшитилгани тўғрисида хабар берилганди. Энергетика вазирлигининг маълум қилишича, гумбурлаш овози магистрал газ қувурининг ёрилиши оқибатида юзага келган.
Маълумотларга кўра, Жиззах вилояти Зарбдор туман Нурафшон ширкат хўжалиги ҳудудидан ўтган диаметри 1020 миллиметр бўлган Пахтакор—Янгиер магистрал газ қувури I тармоғи 30-километрида ёнғинсиз қувур ёрилиши содир бўлган.
Таъкидланишича, тезкорлик билан ҳолат юзасидан ваколатли органларга хабар берилган. Натижада соат 22:25 да «Ўзтрансгаз» АЖ марказий диспетчерлик хизмати кўрсатмаси билан Пахтакор—Янгиер магистрал газ қувурининг 19 ва 54-километрларида беркитиш мосламалари тўлиқ ёпилган.
Ёрилиш натижасида жароҳатланган ёки жабрланганлар йўқ.
Соат 00:00 атрофида махсус бригада зарурий авария тиклаш техника воситалари билан воқеа жойига етиб борган. Авария оқибатларини бартараф этиш, магистрал газ қувури фаолиятини тезкорлик билан тиклаш мақсадида штаб ташкиллаштирилган.
Маълум қилинишича, энергетика вазири Алишер Султонов ҳодиса кўлами ва уни бартараф этиш юзасидан кўрилаётган чора-тадбирларни бевосита ўрганиш ҳамда тегишли чора кўриш учун зудлик билан воқеа жойига етиб борган.
«Айни пайтда авария тиклаш ишлари олиб борилмоқда. Ҳозирда узунлиги 36 метр бўлган қувур монтаж қилиняпти. Мазкур жараёнга малакали мутахассислар ҳамда барча зарур техника воситалари жалб қилинган», — дейилади хабарда.
Қайд этилишича, мазкур магистрал газ қувури 1984 йилда ишга туширилган бўлиб, айни пайтда ҳодиса сабаблари ўрганилмоқда.
Эслатиб ўтамиз, декабрь охирларида Гулистонда икки марта кучли гумбурлаш овози эшитилганди. Кейинроқ ФВВ Сейсмопрогностик мониторинг Республика маркази бу зилзила оқибатида юзага келгани, зилзила ўчоғи ер юзасига яқин бўлгани сабабли гумбурлаш овози эшитилганини маълум қилган эди.
Изоҳ (0)