COVID-19 tarqalishi va ob-havo o‘rtasida bog‘liqlik yo‘q, Rossiyada hayvonlar uchun koronavirusga qarshi dunyodagi birinchi vaksina ro‘yxatdan o‘tkazildi, ispaniyaliklar plyajda ham niqob taqishi shart. Koronaxabarlar

So‘nggi bir kecha-kunduzda yuz bergan koronavirus bilan bog‘liq eng muhim xabarlar — “Daryo” koronadayjestida.

Jahon meteorologiya tashkiloti (JMT) ob-havo va koronavirus infeksiyasi tarqalishi o‘rtasida bog‘liqlikni aniqlamadi. Bu haqda Rossiya Gidrometeorologiya markazi ilmiy rahbari Roman Vilfand ma’lum qildi.

Uning so‘zlariga ko‘ra, JMT fizika, tibbiyot, iqlimshunoslik va fiziologiya sohasidagi tadqiqotchilardan iborat guruh tuzgan. Ular yarim yildan oshiqroq vaqt ish olib borib, ob-havo xususiyatlari va COVID-19 tarqalishi faolligi o‘rtasida ahamiyatli bog‘liqlik yo‘q, degan xulosaga kelgan.

Vilfandning ta’kidlashicha, koronavirus infeksiyasining tarqalishi mavsum va ob-havo sharoitlaridan qat’i nazar sodir bo‘ladi.

“‘Rosselxoznadzor’ qoshidagi Hayvonlar salomatligini saqlash federal markazi tomonidan ishlab chiqilgan, etxo‘r hayvonlar uchun mo‘ljallangan koronavirusga qarshi “Karnivak-Kov” sorbitlangan faolsizlantirilgan vaksina Rossiyada ro‘yxatdan o‘tkazildi. U bugungi kunda hayvonlar uchun COVID-19’ga qarshi dunyodagi yagona profilaktika vositasidir”, — dedi Savenkov.

Vaksinani ommaviy ishlab chiqarish apreldayoq boshlanishi mumkin, dedi u. Gretsiya, Polsha, Avstriya, AQSh, Kanada va Singapur kompaniyalari allaqachon doriga qiziqish bildirgan.

Vaksinaning klinik sinovlari 2020-yil oktabridan boshlab it, mushuk, shimol tulkisi, qorako‘zan, tulki va boshqa jonivorlarda o‘tkazilgan. Vaksina qabul qilgan hayvonlarda 100 foiz holatlarda koronavirusga nisbatan antitanalar hosil bo‘lgan. Emlangandan keyin ishlab chiqariladigan immunitet kamida olti oyga yetadi.

Yangi qoidalar muddatsiz tarzda amal qiladi. Bungacha ochiq havoda niqob taqish majburiyati odamlar orasidagi masofa 1,5 metrdan kam bo‘lgan holatlarda amal qilardi.

Niqoblardan foydalanish plyajlarda va basseynlar yonida ham majburiy bo‘ladi. Faqat niqob taqish oqibatida nafas yo‘llari kasalligi og‘irlashadigan odamlar hamda niqobni mustaqil taqib-yecholmaydigan nogironlar, shuningdek, ochiq havoda yakka tartibda sport bilan shug‘ullanayotganlargina niqob taqmasligi mumkin.

Avvalroq Ispaniyada hukumat Muqaddas haftalik munosabati bilan 26-martdan 9-aprelgacha amal qiluvchi boshqa bir qator cheklovlarni joriy qilgan edi. Shu davrda 23:00 dan 6:00 gacha komendantlik soati amal qiladi, yopiq joylarda to‘rt kishi, ochiq havoda esa olti kishidan ortiq odam bo‘lib to‘planish taqiqlanadi, hududlararo harakatlanish mumkin emas.

Ispaniya Sog‘liqni saqlash vazirligi ma’lumotlariga ko‘ra, mamlakatda 3,27 million kishi koronavirusga chalingan, shularning 75 mingi vafot etgan. 29-mart holatiga ko‘ra, bir kecha-kunduzda 1564 kishida COVID-19 aniqlangan.

• Berlinda 31-martdan koronavirus tufayli yangi cheklovlar kuchga kirdi. Unga muvofiq, shaharliklar ba’zi muassasalar, shu jumladan, sartaroshxona, muzey, nooziq-ovqat do‘konlariga faqat manfiy natijali PZR-test bilan borishi mumkin.
• Germaniyada AstraZeneca Angliya—Shvetsiya kompaniyasining vaksinasini faqat 60 yoshdan oshgan odamlar uchun qo‘llashga ruxsat berildi. Germaniya hukumati fikricha, ushbu yosh guruhida vaksina asoratlarni keltirib chiqarmaydi.
• Italiya esa mamlakatga Yevroittifoqning boshqa davlatlaridan qaytib keluvchilarning barchasi uchun besh kunlik majburiy karantin joriy qilishni rejalashtirmoqda. Yevroittifoqqa kirmaydigan mamlakatlardan qaytib kelayotganlar uchun karantin o‘tash majburiyati esa Italiyada allaqachon amal qilib kelmoqda.