Россиянинг Ленинград вилояти, Отрадной шаҳридаги «Пелла» кемасозлик заводида қурилаётган «Скорпион» траулери (балиқ овлаш кемаси) 30 март куни синовлар пайтида ағдарилиб кетди, деб ёзади Meduza.
Хабарга кўра, Россия байроғи рангидаги 61 метрлик кема ён томонига қулаб, искала деворига суяниб қолган. Фавқулодда вазиятлар вазирлигининг маълум қилишича, кема ағдарилгач, унинг устига сув тоша бошлаган, аммо кейин сувни тўхтатиш учун траулерда керакли чоралар кўрилган.
Таъкидланишича, кемани асл ҳолатига қайтариш режалаштирилмоқда. Нефть ёқилғиси тўкилиб кетишининг олдини олиш учун траулер атрофида тўсиқлар ўрнатилди.
Ленинград вилояти ҳукуматининг хабар беришича, ҳодиса содир бўлган пайтда траулер бортида 80 киши бўлган, 78 нафар ишчи «зудлик билан эвакуация қилинган». Шу билан бирга, эвакуация қилинишидан олдин ишчилар кеманинг турли қисмларидан тутиб, бир мунча вақт траулерда қолгани ҳақида ҳам хабарлар мавжуд.
Шу ўринда Фавқулодда вазиятлар вазирлиги олти ишчи кемани ўзлари тарк этганини айтди, бошқа ўнлаб ишчиларнинг аҳволига аниқлик киритилмади. Расмий маълумотларга кўра, икки киши қовурға синиши билан касалхонага ётқизилган.
Шунингдек, ҳодиса оқибатида траулернинг бир эркак ва бир аёл ходими ҳалок бўлгани ҳақида хабар қилинди.
«Фонтанка»нашрининг хабар беришича, уларнинг йўқлиги ҳодисадан сўнг барча ишчилар санаб чиқилгандан кейин сезилган. Шундан сўнг ғаввослар қидирувга жалб қилинган. 30 март куни кечқурун улар кеманинг думидан икки ходимнинг жасадини топди.
Нашрнинг аниқлик киритишича, марҳумлар «Интро-Пелла» МЧЖнинг 44 ёшли ходими Дмитрий Белоусов ва «РекордСтрой» компанияси ходими, кемада бўёқчи бўлиб ишлаган 37 ёшли Матлубахон Иброҳимова. Маълум қилинишича, Белоусов кабелларга ўралиб қолиб вафот этган.
«Кема нишабликка ўгириш синовлари пайтида ағдарилиб кетди», — деди «Пелла» заводи бош директорининг ўринбосари Иля Вайсман. 47news хабарига кўра, синовларда ҳар бири 6,5 тонна оғирликдаги бетон билан тўлдирилган металл кублар ишлатилган. Бу иккинчи кунги синовлар бўлган, аммо биринчи ҳолатда ишчилар кемадан чиқарилган. Кема ағдарилганини кўрган гувоҳлар журналистларга биринчи марта бундай бўлмаётганини айтган. «Пелла» буни рад этмоқда.
Тергов қўмитаси қурилиш ёки шу каби ишларда хавфсизлик қоидаларини бузиш моддаси билан жиноий иш қўзғади. Шимоли-ғарбий транспорт прокуратураси мазкур иш бўйича терговни ўз назоратига олди.
Изоҳ (0)