Италия карабинерлари томонидан Римда ўтказилган махсус операция давомида Россия фойдасига жосусликда гумон қилинган икки киши ҳибсга олинди, деб ёзмоқда Meduza.
La Repubblica газетасининг ёзишича, улардан бири Италия денгиз флотининг катта офицери ва фрегат капитани, иккинчиси Россиянинг Римдаги элчихонаси ҳарбий ходими бўлган.
30 март куни кечқурун италиялик ҳарбий пул мукофоти эвазига россиялик ҳарбийга баъзи ҳужжатларни топшираётган пайтида улар ҳибсга олинган. Corriere Della Sera нашрининг хабарига кўра, булар НАТЎга оид баъзи махфий ҳужжатлар бўлган. Гумондорларнинг исмлари ошкор қилинмаган.
«РИА Новости» хабарига кўра, ҳодиса муносабати билан Россия элчиси Италия Ташқи ишлар вазирлигига чақирилган.
Россия дипломатик департаменти ҳарбий ходимнинг ҳибсга олинганини тасдиқлади. «Ҳодиса сабаблари ўрганилмоқда. Ҳозирча бу ҳақда изоҳ бериш ноўрин деб ҳисоблаймиз. Нима бўлганда ҳам, содир бўлган воқеа Россия ва Италия ўртасидаги ўзаро муносабатларга таъсир қилмайди деб умид қиламиз», — дейилади Россия элчихонаси баёнотида.
Ҳибсга олинган россиялик аскар мамлакатдан чиқариб юборилади, чунки унинг дипломатик мақоми уни ҳибсга олишга имкон бермайди, дея қўшимча қилади Corriere Della Sera.
Кейинроқ Италия Ташқи ишлар вазирлиги жосуслик ишига алоқадорлиги тахмин қилинган Россия элчихонасининг икки ходими мамлакатдан чиқариб юборилиши ҳақида эълон қилди.
«Биз ушбу ўта жиддий ишга алоқадор икки россиялик амалдорнинг зудлик билан мамлакатдан чиқариб юборилиши тўғрисида маълум қиламиз», — деб ёзган вазир Facebook’даги саҳифасида.
Аввалроқ Болгарияда икки нафар россиялик дипломат жосусликда гумон қилиниб, Россияга қайтариб юборилган эди. Шунингдек, Швеция фуқароси Россия фойдасига жосусликда айбланиб, ҳибсга олинган.
Эслатиб ўтамиз, Буюк Британияда бир йил ичида учинчи бор Хитой айғоқчиси аниқланган. Ушбу фуқаролар ХХР Давлат хавфсизлик вазирлиги разведкасида хизмат қилган ва Британияга журналист визаси билан келган.
Изоҳ (0)