Buyuk Britaniyada bir yil ichida uchinchi bor Xitoy ayg‘oqchisi aniqlandi
So‘nggi bir yil ichida Buyuk Britaniya hukumati o‘zini jurnalist sifatida ko‘rsatgan uch nafar xitoylik josusni mamlakatdan chiqarib yubordi, deb yozmoqda “TASS”.
Xabarga ko‘ra, ushbu fuqarolar XXR Davlat xavfsizlik vazirligi razvedkasida xizmat qilgan va Britaniyaga jurnalist vizasi bilan kelgan. Uchala ayg‘oqchi ham nomlari hali aniqlanmagan uch xil Xitoy ommaviy axborot vositalarida ishlagan. Ingliz kontrrazvedka xodimlari tomonidan ayg‘oqchilarning haqiqiy shaxsi aniqlandi.
Ta’kidlanishicha, ayni paytda Buyuk Britaniya hukumati chet el hukumati nomidan ish yuritadigan shaxslarni ro‘yxatga olishni talab qiluvchi qonun yaratish haqida o‘ylamoqda. Aks holda, bunday shaxslar qamoq yoki deportatsiya singari jazolarga uchrashi mumkin.
Avvalroq Xitoy politsiyasi mamlakatda COVID-19’ga qarshi qalbaki vaksina sotgan 80 dan ortiq kishini hibsga olgani haqida xabar berilgandi. Gumonlanuvchilar 2020-yilning sentabr oyidan beri shprislarni oddiy fiziologik eritma bilan to‘ldirib, vaksina niqobi ostida yuqori narxda sotib kelgan.
Eslatib o‘tamiz, Brexit sabab Britaniyaning 50 ga yaqin kompaniyasi Fransiyaga ko‘chib o‘tgan. Pandemiyaga qaramay, allaqachon deyarli 2,5 ming ish o‘rni Buyuk Britaniyadan Fransiyaga o‘tkazilgan. 2021-yil bunday transferlar tezlashishi kutilmoqda.
