Xiaomi kompaniyasi eng so‘nggi va qimmat texnologiyalarni o‘zida mujassam etgan Mi 11 Ultra flagmanini taqdim etdi, deb xabar beradi Hi-Tech.Mail.ru.
Xiaomi Mi 11 Ultra massiv kamera moduli bilan qolgan modellardan ajralib turadi. Obyektivlarning o‘ng tomonida kichkina qo‘shimcha ekran joylashgan bo‘lib, unda vaqt va kelgan xabarlar ko‘rsatiladi, shuningdek, undan selfi uchun ham foydalanish mumkin.
Mi 11 Ultra’ning asosiy kamerasi Mi 11 Pro’niki kabi — Samsung’ning 50 Mp va 1/1,12 o‘lchamli GN2 sensori. Bunga qo‘shimcha sifatida 128 daraja atrofni tasvirga oluvchi keng burchakli 48 Mp, shuningdek, 5 karra optik zumli telefotoobyektiv o‘rnatilgan.
Smartfon korpusi shishadan ishlangan (keramika varianti ham bor) va chang hamda namlikda IP68 standarti bo‘yicha himoyalangan — u 1,5 metr chuqurlikda suv ostida yarim soat tura oladi. Biroq ichiga suv kirishi oqibatida yuzaga kelgan nuqsonlar kafolat ichiga kirmaydi.
Shuningdek, qurilma QHD+ sifatli hamda 120 gerts chastotali katta AMOLED-displeyga ega bo‘lgan. Smartfon Snapdragon 888 protsessorida ishlaydi, shuningdek, unga sig‘imi 5000 mA/soatli yangicha tipdagi kremniy-kislorodli anod akkumulyator o‘rnatilgan.
Ushbu smartfonning 8/256 Gb versiyasi Xitoyda 5999 yuandan (913 AQSh dollari) sotuvga chiqqan.
Avvalroq Xiaomi geymerlar uchun Black Shark 4 va 4 Pro flagmanlarini taqdim etgani to‘g‘risida xabar berilgandi.
Izoh (0)