AQSh prezidenti Jozef Bayden KXDR rahbari Kim Chen In bilan uchrashuv o‘tkazishni rejalashtirayotgani yo‘q. Bu haqda Oq uy vakili Jen Psakiga tayanib, “RBK” xabar berdi.
Jurnalistlar Psakidan KXDR bilan munosabatlarda Baydenning yondashuvi ilgari Donald Tramp qo‘llagani kabi Shimoliy Koreya rahbari bilan uchrashuv o‘tkazishni anglatadimi, deb so‘radi.
“Fikrimcha, Baydenning yondashuvi Trampnikidan farq qiladi. U Kim Chen In bilan uchrashuv o‘tkazish niyatida emas” — dedi Psaki.
Avvalroq Oq uy fevral o‘rtalaridan buyon bir nechta diplomatik kanallar, shu jumladan, Nyu-Yorkdagi kanallar orqali Pxenyan bilan bog‘lanishga urinib kelgani, ammo Shimoliy Koreya rahbariyati bu urinishlarni e’tiborsiz qoldirganini aytgan edi.
Shimoliy Koreya hukumati esa Vashington Pxenyanga nisbatan dushmanlik siyosatidan voz kechmaguncha AQShning yangi ma’muriyati bilan aloqa o‘rnatmasligini aytdi. KXDR tashqi ishlar vaziri o‘rinbosarining ta’kidlashicha, Pxenyan va Vashington o‘rtasidagi muloqot “bir stolda teng huquqli o‘tirib, fikr almashish” muhitini talab qiladi.
Avvalroq Shimoliy Koreyaning qanotli raketalarni sinovdan o‘tkazgani haqida xabar berilgandi. Xabarga ko‘ra, Sariq dengiz mintaqasidan ikkita raketa uchirilgan.
The Washington Post gazetasining xabar berishicha, AQSh Mudofaa vazirligi vakillari razvedka ma’lumotlari Shimoliy Koreyaning raketa sinovlarini rejalashtirayotgani haqida ogohlantirgan.
Gazetaning yozishicha, xabar qilinmagan raketa sinovlari KXDR yetakchisi Kim Chen Inning AQSh prezidenti Jo Baydenga bo‘lgan birinchi to‘g‘ridan to‘g‘ri da’vosini anglatadi.
Izoh (0)