Kanada va Avstraliya Qrim sababli Rossiyaga qarshi yangi sanksiyalar e’lon qildi

Kanada Rossiyaning Qrimni o‘ziga qo‘shib olishi munosabati bilan unga qarshi yangi sanksiyalar joriy qildi, deb yozmoqda “RBK”.

Rossiyalik ikki nafar jismoniy va to‘rtta yuridik shaxs cheklovlar ostiga tushdi, xususan:

•  Grand Service Express kompaniyasi (Qrim bilan temir yo‘l aloqa operatori)ning bosh direktori Aleksandr Ganov;
• “Mostotrest” infratuzilma qurilish kompaniyasi direktori Leonid Rijenkin;
• “Lenpromtransproekt” ochiq aksiyadorlik jamiyati (OAJ);
• “Qrim temir yo‘li” Federal davlat unitar korxonasi;
• “Qrim birinchi sug‘urta kompaniyasi”;
• “Berkakit-Tommot-Yakutsk temir yo‘l qurilish boshqarmasi” OAJ.

Ottavada ta’kidlanishicha, sanksiyalar “Rossiyada inson huquqlarini qo‘pol va muntazam ravishda buzilishida ishtirok etgan” shaxslarga nisbatan qo‘llanilmoqda. Kanada hukumati mansabdor shaxslarni aynan nima uchun sanksiyalar ro‘yxatiga kiritganini ma’lum qilmadi, ammo bu AQSh moliya vazirligi tomonidan Aleksey Navalniy atrofidagi vaziyat tufayli e’lon qilingan sanksiyalar ro‘yxatga mos keladi.

Rossiya prezident matbuot kotibi Dmitriy Peskovning ta’kidlashicha, Moskva Kanadaning Rossiyaga qarshi sanksiyalarini noqonuniy deb hisoblaydi va unga qarshi choralar ko‘radi. Rossiyaning Kanadadagi elchixonasi yangi cheklovlar “haqiqatni inkor etadi” va “nafaqat xalqaro qonunchilikka, balki insonparvarlik tamoyillariga ham zid keladi” deb hisoblaydi.

Kanadadan keyin Avstraliya hukumati Rossiyaga qarshi sanksiyalar kiritdi. Avstraliya Qrim ko‘prigining temir yo‘l qismini qurish va ekspluatatsiya qilishga aloqador rossiyalik bir nafar fuqaro va to‘rtta kompaniyaga qarshi cheklovlar joriy qildi.

Avstraliya tashqi ishlar Maris Peynning ta’kidlashicha, mazkur chora-tadbirlar avvalroq sanksiyalar e’lon qilgan Kanada bilan kelishilgan holda, shuningdek Yevroittifoq va Buyuk Britaniya tomonidan e’lon qilingan cheklovlarga muvofiq qo‘llanilgan. Vazir Rossiyaning qaysi kompaniyalari va fuqarolariga nisbatan sanksiya kiritilganiga aniqlik kiritmadi.

“Kerch orqali o‘tuvchi ko‘prik — Rossiya o‘ziga noqonuniy qo‘shib olgan Qrim yarimoroli ustidan nazoratini mustahkamlashga urinishning belgisidir. Sanksiyaga uchragan  shaxslar o‘z xatti-harakatlari bilan Qrim va Sevastopolning noqonuniy anneksiyasini qonuniylashtirishga urinish va Ukraina sharqidagi ayirmachilar faoliyatini qo‘llab-quvvatlashda ishtirok etmoqda”, — dedi vazir.

Avvalroq Ukraina prezidenti Vladimir Zelenskiy Rossiyaning jismoniy va yuridik shaxslariga yangi sanksiyalar kiritgan edi.