Навоий вилояти прокурори Бахтиёр Аҳмедов вилоят ДХХ бошқармаси билан ҳамкорликда вилоят ҳудудида қурилиш соҳасида давлат харидларини амалга ошириш жараёнида коррупцион ҳолатларга йўл қўймаслик борасида соҳага масъул ташкилотлар иштирокида йиғилиш ўтказди, дея хабар бермоқда Бош прокуратура.
Йиғилишда Навоий вилоят ҳокимининг соҳа бўйича ўринбосари, 5 та буюртмачи ташкилот раҳбарлари ва тендер комиссияси аъзолари қатнашиб, улар 2021 йилда амалга ошириладиган қурилиш-таъмирлаш учун пудратчиларни танлашда амалдаги тартиб-қоидаларга оғишмай риоя этиш, таниш-билишчилик ва бошқа коррупцион ҳолатларга йўл қўймаслик хусусида расман огоҳлантирилган.
Шунингдек, йиғилишда лойиҳа ва пудрат ишлари (хизматлари) хариди жараёнларининг шаффофлигини таъминлаш, ушбу соҳада «Шаффоф қурилиш» миллий ахборот тизимидан, шу жумладан, электрон тендер платформасидан тизимли фойдаланиш ҳамда танлов (тендер) ғолиблари билан ўрнатилган тартибда пудрат шартномаларини тузиш чораларини кўриш бўйича зарур кўрсатмалар берилган.
Бундан ташқари, масъулларга қурилиш соҳасида йўл қўйилаётган коррупцион ҳолатлар, бюджет маблағларининг мақсадсиз сарфланиши ва қурилиш жараёнида шаҳарсозлик норма талаблари бузилиш ҳолатларига йўл қўйиб келинаётганлиги таъкидланиб, аниқланган ҳар бир ҳолатга нисбатан кескин чора кўрилиши ва қонуний жавобгарлик муқаррарлиги тушунтирилган.
Бундан аввал Навоийда таъсисчиси сенатор бўлган компания қурилиш ишларида қонунбузарликка йўл қўйгани, Қурилиш вазирлиги Тошкентда бир қатор кўп қаватли турар жой бинолари ноқонуний қурилаётгани аниқланса-да, қурилиш ишлари тўхтатилмаганини ҳамда Қашқадарёда қурилиш талабларини бузган бир қанча компанияларга чора кўрилганини маълум қилгани ҳақида хабар берилганди.
Изоҳ (0)