Toshkent viloyati Bekobod shahrida fuqaroning shaxsiy suratlarini tarqatib yubormaslik evaziga undan 5 million so‘m so‘ragan voyaga yetmagan qiz ushlandi, deya xabar bermoqda Tergov departamenti.
Qayd etilishicha, 2021-yilning 25-mart kuni Bekobod shahar IIB boshlig‘i nomiga fuqaro 36 yoshli M.G. ariza bilan murojaat qilib, turmush o‘rtog‘ining muqaddam foydalangan abonent raqamidan noma’lum ayol qo‘ng‘iroq qilib, turmush o‘rtog‘i Sh.V. bilan unga tegishli sir saqlanishi lozim bo‘lgan o‘zaro surat va videoyozuvlarini internet orqali tarqatib yuborish bilan qo‘rqitib, 5 000 000 so‘m pul berishini talab qilayotganligini ma’lum qilgan.
Arizaga ko‘ra, Bekobod shahar 14-dahasi hududidagi “Ziyoda” to‘yxonasi yaqinida taksi haydovchisi orqali berib yuborilgan 500 AQSh dollarini noma’lum ayol tovlamachilik yo‘li bilan olayotganida IIB xodimlari tomonidan ushlanib, undan 500 dollar ashyoviy dalil tariqasida olingan.
Tergovga qadar tekshiruv harakatlari davomida, ushbu jinoyatni 9-sinf o‘quvchisi 15 yoshli M.X. sodir etgani aniqlanib, u Sh.V.ga tegishli bo‘lgan abonent raqamini sotib olib, ushbu raqamga Telegram ilovasini ochib, eski xotiralarni tiklashi natijasida o‘zga shaxslarning foto va videosuratlarini qo‘lga kiritgan.
Mazkur holat yuzasidan Bekobod shahar IIB huzuridagi tergov bo‘limi tomonidan voyaga yetmagan M.X.ga nisbatan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilib, gumon qilinuvchi tariqasida jalb qilingan.
Hozirda tergov harakatlari olib borilmoqda.
Bundan avval Xorazmda ayolning shaxsiy videotasvirlarini qarindoshlariga ko‘rsatish bilan qo‘rqitib, undan 1,5 ming dollar va telefon talab qilgan yigit ushlangani, Toshkentda qizi va yigit o‘rtasidagi munosabatlarni sir saqlash uchun yigitning otasidan pul talab qilgan ayolga jinoyat ishi qo‘zg‘atilgani hamda Farg‘onada dugonasining suratlarini turmush o‘rtog‘iga ko‘rsatmaslik uchun 1,5 ming dollar talab qilgan qizlar ushlangani haqida xabar berilgandi.
Izoh (0)