To‘rtko‘lda fuqaroga 30 mln so‘mga 10 gektar yer olib berishni va’da qilgan shaxs ushlandi

Qoraqalpog‘istonning To‘rtko‘l tumanida fuqaroga yer maydoni olib berishni va’da qilib, firibgarlik yo‘li bilan pul olgan shaxs ushlandi.

Bosh prokuratura huzuridagi Iqtisodiy jinoyatlarga qarshi kurashish departamentining ma’lum qilishicha, “A.” MChJ rahbari N.X. fuqaro X.ning ishonchiga kirib, unga 30 million so‘m evaziga To‘rtko‘l tumani hududidan bog‘dorchilik va uzumchilikni rivojlantirish yo‘nalishi bo‘yicha 10 gektar yer maydoni olib berishni va’da qilgan.

Pullarni firibgarlik yo‘li bilan olgan vaqtida N.X. departament hamda DXXning Qoraqalpog‘iston Respublikasi boshqarmalari tomonidan o‘tkazilgan tezkor tadbirda ashyoviy dalillar bilan ushlangan.

Holat yuzasidan N.X.ga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Navoiyda tadbirkorga tegishli yerni 150 ming dollarga sotishga uringan shaxs ushlangani, Buxoro tumani hokimligi zaxirasidagi yerni 23,5 ming dollarga sotmoqchi bo‘lgan shaxsga jinoyat ishi qo‘zg‘atilgani, Xorazmda 5 ming dollar evaziga yer olib berishni va’da qilgan shaxslar ushlangani haqida xabar berilgan edi.