Қорақалпоғистоннинг Тўрткўл туманида фуқарога ер майдони олиб беришни ваъда қилиб, фирибгарлик йўли билан пул олган шахс ушланди.
Бош прокуратура ҳузуридаги Иқтисодий жиноятларга қарши курашиш департаментининг маълум қилишича, «А.» МЧЖ раҳбари Н.Х. фуқаро Х.нинг ишончига кириб, унга 30 миллион сўм эвазига Тўрткўл тумани ҳудудидан боғдорчилик ва узумчиликни ривожлантириш йўналиши бўйича 10 гектар ер майдони олиб беришни ваъда қилган.
Пулларни фирибгарлик йўли билан олган вақтида Н.Х. департамент ҳамда ДХХнинг Қорақалпоғистон Республикаси бошқармалари томонидан ўтказилган тезкор тадбирда ашёвий далиллар билан ушланган.
Ҳолат юзасидан Н.Х.га нисбатан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ Навоийда тадбиркорга тегишли ерни 150 минг долларга сотишга уринган шахс ушлангани, Бухоро тумани ҳокимлиги захирасидаги ерни 23,5 минг долларга сотмоқчи бўлган шахсга жиноят иши қўзғатилгани, Хоразмда 5 минг доллар эвазига ер олиб беришни ваъда қилган шахслар ушлангани ҳақида хабар берилган эди.
Изоҳ (0)