Xorazm viloyatida Urganch shahrida yashovchi ayolning pul va telefonlarini tovlamachilik yo‘li bilan olmoqchi bo‘lgan shaxs qo‘lga olindi, deya xabar bermoqda Tergov departamenti.
Ma’lum qilinishicha, viloyat IIB boshlig‘i nomiga fuqaro 32 yoshli Sh.N. (ayol) ariza bilan murojaat qilib, unda tanishi 31 yoshli F.B. u uchun sir saqlanishi lozim bo‘lgan videotasvirlarni yaqin qarindoshlariga ko‘rsatib sharmanda qilish bilan qo‘rqitib, 1 500 AQSh dollar va Samsung Galaxy S20 rusumli telefon berishini talab qilayotganligini ma’lum qilgan.
Ta’kidlanishicha, 2021-yilning 16-mart kuni soat 20:00 da Urganch shahri A.T. ko‘chasida F.B. 1 500 AQSh dollari va Samsung Galaxy S20 rusumli telefon apparatini Sh.N.dan tovlamachilik yo‘li bilan olayotgan vaqtida ashyoviy dalillar bilan ushlangan.
Mazkur holat yuzasidan Urganch shahri bo‘yicha IIO FMB huzuridagi Tergov bo‘limi tomonidan F.B.ga nisbatan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilib, gumon qilinuvchi tariqasida jalb qilingan.
Hozirda tergov harakatlari olib borilmoqda.
Ma’lumot uchun, bu turdagi jinoyatlar uchun Jinoyat kodeksining normalariga ko‘ra, 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish jazosi tayinlanadi.
Bundan avval Toshkentda qizi va yigit o‘rtasidagi munosabatlarni sir saqlash uchun yigitning otasidan pul talab qilgan ayolga jinoyat ishi qo‘zg‘atilgani, Buxoroda tadbirkorga qurol o‘qtalib, undan 70 ming dollar talab qilgan sportchilar qo‘lga olingani hamda Farg‘onada dugonasining suratlarini turmush o‘rtog‘iga ko‘rsatmaslik uchun 1,5 ming dollar talab qilgan qizlar ushlangani haqida xabar berilgandi.
Izoh (0)