O‘zbekiston—Turkiya hamkorligida o‘tkazilgan Termizdagi maxsus-taktik o‘quvlar yakunlandi, deya xabar qilmoqda Mudofaa vazirligi.
Qayd etilishicha, 25-mart kuni Termiz dala-o‘quv maydonida mashg‘ulotning asosiy bosqichi o‘tkazilib, unda ikki davlat harbiylari birgalikda shartli qurollangan to‘dalarni turli sharoitlarda zararsizlantirish bo‘yicha amaliy harakatlarni olib bordi.
Taktik-o‘quv mashg‘ulotlarini Turkiya Qurolli Kuchlari bosh shtabi boshlig‘i, armiya generali Yashar Guler hamda O‘zbekiston Mudofaa vazirining birinchi o‘rinbosari – Qurolli Kuchlar bosh shtabi boshlig‘i, general-mayor Shuhrat Xolmuhamedov bevosita kuzatib bordi.
Mashg‘ulot rejasiga ko‘ra, davlat chegarasini buzib o‘tishga uringan bir guruh noqonuniy qurollangan shartli dushman haqida razvedka ma’lumotlari olindi. Uchuvchisiz uchish apparati yordamida shartli dushmaning soni va jangovar imkoniyatlari, ular qo‘lga olgan hudud o‘rganildi.
To‘plangan ma’lumotlarga asosan ikki davlat bo‘linmalari aviatsiya, yengil zirhlangan jangovar texnikalar va o‘t ochish vositalari yordamida dushman to‘dalariga zarba berib, ularning kuch tuzilmalarini yo‘q qildi.
Maxsus-taktik o‘quvda nafaqat ikki davlat armiyasi, shuningdek, O‘zbekiston Qurolli Kuchlar tuzilmalari o‘rtasida hamkorlikda harakatlanish ko‘nikmalarini oshirishga ham e’tibor qaratildi.
Ta’kidlanishicha, hamkorlikdagi o‘quv mashg‘uloti o‘zbek va turk harbiylari uchun o‘zaro tajriba almashish, bilim va ko‘nikmalarini mustahkamlash, eng muhimi, o‘zaro hamjihatlik va do‘stlik aloqalarini mustahkamlashga xizmat qildi.
Maxsus-taktik o‘quvlar yakunida mashg‘ulotlarda faol qatnashgan har ikki mamlakat harbiy xizmatchilari munosib taqdirlandi.
Bundan avval O‘zbekiston va Turkiya o‘rtasida harbiy-moliyaviy hamkorlik bitimi tasdiqlangani hamda O‘zbekiston va Hindiston harbiylari “Do‘stlik-II” o‘quv mashg‘ulotlarini o‘tkazgani haqida xabar berilgandi.
Izoh (0)