“Turk havo yo‘llari” (Turkish Airlines) Turkiyaning yirik shaharlaridan Farg‘onaga to‘g‘ridan to‘g‘ri reyslarni yo‘lga qo‘ymoqchi. Bu haqda Farg‘ona viloyati hokimligi xabar qildi.
Ma’lum qilinishicha, aviakompaniyaning O‘zbekistondagi vakolatxonasi bosh direktori Selim Kahriman boshchiligidagi ko‘p sonli turk mutaxassislaridan iborat ishchi guruh Farg‘ona xalqaro aeroportini ko‘zdan kechirish hamda mavjud infratuzilma va xavfsizlik tizimi bilan joyida tanishish uchun Farg‘onaga keldi.
Mehmonlarni aeroport direktori Timur Xalilov hamda viloyat hokimligi mutasaddilari kutib oldi.
Muloqot chog‘ida Farg‘ona aeroportining vodiy hududida tutgan o‘rni va roli alohida e’tirof etildi. Mehmonlarga viloyatning iqtisodiy va yo‘lovchi salohiyati, shuningdek, Turkiya bilan hamkorlik yo‘nalishlari haqida ma’lumot berildi.
Uchrashuv chog‘ida havo kemalariga yer usti xizmat ko‘rsatish hamda umumiy xavfsizlik risklari masalalari alohida muhokama qilindi.
Bundan avval Uzbekistan Airways 29-martdan boshlab Samarqanddan Istanbulga muntazam aviaqatnovlarni amalga oshirishi, Uzbekistan Airways Urganch va Farg‘onadan Istanbulga muntazam qatnovlarni yo‘lga qo‘yishi hamda Toshkentdan Olmaotaga parvozlar 28-martdan har kuni amalga oshirilishi haqida xabar berilgandi.
Izoh (0)